Ministériu Saúde hala’o semináriu kona-ba Planu Estratéjiku Institutu Nasionál Saúde nian
Ministériu Saúde hala’o semináriu iha loron ida nia laran kona-ba Planu Estratejiku Institutu Nasionál (INS) nian ba tinan 2011 to’o 2012 ho objetivu atu muda naran Institutu Siénsia Saúde ba Institutu Nasionál Saúde tuir Dekretu Lei No. 9/2011.
Kompeténsia INS tuir Dekretu Lei, mak “dezenvolve no fó formasaun kontínua ba profisionál saúde sira, tuir politika sira ne’ebé define ona hosi Ministériu Saúde, garante kualifikasaun ho kualidade ba profisionál saúde nian no halo akordu koperasaun nian ho instituisaun formasaun sira seluk iha área saúde nian atu fó kapasitasaun ba profisionál saúde sira”, hateten diretór jerál Ministériu Saúde, Agapito da Silva Soares.
Diretór jerál hatutan tan katak “Iha períodu tranzisaun hosi ICS ne’e, agora daudaun INS hetan suporte husi UNICEF, iha dezenvolvimentu no implementasaun padraun prátika ba parteira iha tinan 2011”. Apoiu ne’e fó liu hosi formadór sira ne’ebé mak envolve kedas iha formasaun ne’ebé uza módulu ne’ebé dezenvolve parteira sira iha ospitál referál sira.
Iha semináriu ne’e konta ho entrega kareta ida hosi UNICEF ba Ministériu Saúde atu fó apoiu ba servisu kuidadu saúde inan ho oan nian iha Timor-Leste.
