Governu Timor-Leste

Ministra Finansa Timor-Leste nian, Emilia Pires no Prezindente hosi Grupu  LGT Foundation  nian,  Prínsipe  Philipp Liechtenstein,  sira hamutuk  asina  Memorandu Entendimentu  iha  loron  11 fulan Novembru.

Objetivu Memorandu Entendimentu nian ne’e atu hala’o kooperasaun hamutuk no promove negósiu  ne’ebé bele fó benefísiu ba Ministériu Finansas (MF) no Grupu  LGT Foundation  no mós empreza  sira seluk  ne’ebé  iha  relasaun, ne’ebé bele inklui transferénsia  koñesimentu tékniku no atividade sira investimentu nian.

LGT Group Foundation  nu’udar grupu ida hosi grupu líder prinsipál sira iha jestaun ba sasán sira ne’ebé mak iha Uma prinsipe Liechtenstein nian. Ho esperiénsia  LGT Group nian iha  jestaun ba sasán sira no programa oin-oin kona-ba investimentu, Grupu  LGT, tanba pedidu hosi MF no tuir mekanizmu ne’ebé prevee iha Lei Fundu Petrolíferu nian, bele ajuda halo revizaun no avaliasaun ba oportunidade sira investimentu nian ne’ebé MF konsidera importante.

Tanba ne’e, halo diskusaun no dokumentasaun espesífika entre MF no Grupu LGT Foundation, bele kria kuadru ida no programa ida atu reprezentante sira ne’ebé hetan nomeasaun hosi MF bele partisipa iha programa formasaun ida iha Grupu  LGT no mós hahú hala’o hamutuk atividade sira investimentu nian.