Governu Timor-Leste

Proposta Lei kona-ba Orsamentu Jerál Estadu (OJE) ba tinan finanseiru 2012 aprezenta ona ba Parlamentu Nasionál iha kuarta-feira ne’e, loron 9 fulan Novembru 2011, husi IV Governu Konstitusionál.

Totál dotasaun orsamentál mak dólar amerikanu $1.763,4 mil millaun.

Dotasaun orsamentál ba kategoria despeza mak tuirmai ne’e:

1 – dólar amerikanu $140,1 millaun ba Saláriu no Vensimentu;

2 – dólar amerikanu millaun $344,7 ba Bens no Servisu, ne’ebé mak dólar amerikanu millaun $30 ne’e tau ba Fundu Dezenvolvimentu Kapitál Umanu Nian;

3 – dólar amerikanu millaun $194,2 ba Transferénsia Públika;

4 – dólar amerikanu millaun $30 ba Kapitál Menór;

5 – dólar amerikanu millaun $1.054,4 iha Kapitál Dezenvolvimentu ne’ebé mak millaun $746,2 tau ba Fundu Infra-estrutura; millaun $52 destina ba Programa Dezenvolvimentu Desentralizadu I no II; nomós millaun $200 ba Kapitalizasaun Kompañia Investimentu Timor-Leste nian.

Iha diskursu aprezentasaun ideia prinsipál dokumentu ninian, Primeiru-Ministru salienta katak “Orsamentu Jerál Estadu ba 2012 mak sei reflete duni objetivu dezenvolvimentu konsubstansiadu iha Planu Estratéjiku Dezenvolvimentu ne’ebé lansa iha fulan Jullu liubá. Planu Estratéjiku Dezenvolvimentu abranje área krusiál tolu ba dezenvolvimentu nasaun nian: kapitál sosiál, infra-estrutura no dezenvolvimentu ekonómiku. Planu ida ne’e hetan mós informasaun husi dadus presiozu Sensu 2010 nian ne’ebé kaer retratu reál no objetivu populasaun no agora transforma-an ba polítika sustentável dezenvolvimentu nian.

Investe iha dezenvolvimentu 2012 signifika investe dólar amerikanu $1.763,4 mil millaun iha polítika sustentável ba país ne’ebé mak sei kapitaliza susesu sira ne’ebe hetan ona to’o oras ne’e, koloka Timor-Leste iha dalan ne’ebe ita hakarak.

(Atu lee diskursu tomak Primeiru-Ministru nian, klika iha ne’e.)

Liu tiha aprezentasaun Primeiru-Ministru, Komisaun Ekonomia, Finansa no Anti-Korrupsaun Parlamentu Nasionál nian aprezenta nia relatóriu no paresér kona-ba Proposta Lei OJE ba 2011 nian ne’ebé hato’o mós rekomendasaun oioin.

Aprezentasaun OJE ba tinan finanseiru 2012 hala’o iha semana ida hafoin Primeiru-Ministru justifika tiha Konta Jerál Estadu 2010 nian iha Parlamentu Nasionál.

Kay Rala Xanana Gusmão garante katak: “Orsamentu Jerál Estadu 2010 ezekuta ona no halo tuir objetivu hotu ne’ebé ita tau ona. Ita investe iha infra-estrutura, estabilidade sosiál no iha ita-nia setór privadu, área fundamentál ba dezenvolvimentu nasionál.

Governu ida ne’e la husik leet de’it oportunidade, hodi investe ho korajen iha dezenvolvimentu sustentável atu hasai ita-nia Povu husi mukit iha tempu badak.