SEPI selebra Loron Nasionál ba Feto sira
Sekretaria Estadu Promosaun Igualdade (SEPI), iha loron 3 Novembru tinan 2011, iha edifísiu Sekretaria Estadu Juventude no Desportu (SEJD), selebra Loron Nasionál ba Feto sira, ho tema “Hakbiit Partisipasaun Feto iha Polítika ba Dezenvolvimentu Nasionál".
Sekretária Estadu Promosaun Igualdade, Idelta Rodrigues, iha nia diskursu hateten, loron 3 fulan Novembru, ita hili hanesan Loron Nasionál ba feto sira, tanba iha tinan tolunulu-resin-lima liu ba, ita-nia feto lutana’in siradora ba rezisténsia Maria Tapo oho iha fronteira, tanba nia sakrifisiu ne’ebé nia halo ba luta ba independénsia. Tinan ida ne’e ita liu-liu hanoin hodi fó onra ba ninia kontribuisaun iha pasadu no mós eroina sira seluk, hanesan Rosa Muki, Maria Gorrete, Isabel Barreto no feto sira seluk ho feto Kraras nian.
“Selebrasaun ne’e sei hala’o mós iha distritu 13 atu bele fó nafatin atensaun ba feto sira nia papél iha rai doben ida ne’ebé ita hotu hadomi. Bainhira feto Timor-Leste sira fó kontribuisaun iha luta ba independénsia nian importante liu katak, tenke halo iha kontestu dame nian no pás nia laran”, hateten Idelta Rodrigues.
Sekretária Estadu hatutan tan katak, dezenvolvimentu feto nian la limita de’it ba iha área doméstika nian, ho eleisaun prezidensiál no Parlamentár ne’ebé hakbesik ona mai ita, iha tinan 2012, tinan ida marka oportunidade importante ba feto, atu hasae sira-nia envolvimentu iha iha moris polítika nian, atu nune’e loke dalan hodi hadi’a liután partisipasaun iha desizaun hotu-hotu ne’ebé la’ós afeta de’it ba moris feto nian, maibé enjerál ba dezenvolvimentu ita-nia nasaun nian.
Idelta tenik tan katak, Feto lori hanoin sira ne’ebé úniku no importante, perspetiva ho koñesimentu ne’ebé krítiku tebes ba dezenvolvimentu estratéjiku sira, polítika sira no lei sira ne’ebé Governa ita-nia nasaun no determina ita-nia prioridade sira futuru nian.
“Ha’u husu ba ita hotu atu hanoin hikas feto hotu-hotu ne’ebé kontinua luta ba justisa, igualdade no progresu iha ita nia nasaun, no mós husu ba mane sira hotu-hotu atu fó apoiu ba ami feto, enkoraza ami, no hakbiit ami, atu hamrik hanesan ho ami iha ami nia sorin, no ita sei hamutuk. Ita sei haree progressu no susesu hotu ne’ebé ita hein, ho moto ida ne’ebé “ Hamutuk ita bele, no forte, ha’u bele, ó bele no ita hotu bele, sin, se kuandu ita servisu hamutuk ita sempre bele,” dehan nia.
Iha biban ne’e mós, reprezentante Sekretáriu Jerál ONU iha Timor-Leste, Ameraah Haq, informa katak, Feto Timor-Leste hatudu nia ezemplu di’ak ba feto hotu-hotu iha mundu tomak, ne’ebé ita boot sira hatudu durante iha ita boot sira nia luta iha konsulta populár no iha oportunidade sira seluk to’o iha momentu ida ne’e. Papél feto nian hatudu duni iha situasaun polítika nian no iha área sira seluk ne’ebé importante no ba to’o iha eleisaun sira ne’ebé tuir mai.
Iha selebrasaun ne’e mós entrega prémiu ba média no sertifikadu ba eis-Pontu Fokál Jéneru, no prémiu ba manan nain sira ba jogu footsal nian no aleinde mós kari ai-funan iha tasi-ibun Lesidere, Dili.
