Ministériu Finansa lansa Sensus Fo Fila Fali
Governu liu hosi Ministériu Finansa servisu hamutuk ho United Nation Population Fund (UNFPA) ho UNICEF, iha sesta-feira, loron 4 fulan Novembru, iha sentru Konvensaun Dili, lansa Sensu Fo Fila Fali ba suku hotu-hotu iha Timor-Leste laran tomak.
Primeiru-Ministru Kay-Rala Xanana Gusmão iha nia intervensaun hateten katak, “Ho laran ksolok tebes, ohin halo lansamentu Sensus Fo Fila Fali ba suku hotu-hotu, tanba ita boot sira hatene katak, sensus halo iha tinan 2010 liubá, liu hosi Diresaun Nasionál Estatístika, ne’ebé iha nia indikadór ne’ebé mak orienta sensus ne’e, hodi nune’e ita bele hatene ita nia rai ne’e, no ita nia povu ne’e nia moris oinsá ona”.
Primeiru-Ministru hatutan tan, “hanesan ita hotu hatene katak iha nasaun ida kompostu hosi nia populasaun ho nia rai,tanba ne’e governu iha obrigasaun atu hatene di’ak liután nia populasaun, hodi fó importánsia espesiál ba rezultadu ne’ebé hetan liu hosi resenseamentu 2010 nian. Governu molok implementa politika ne’ebé di’ak ba ita nia povu, tenke hatene ita nia populasaun hira mak hela iha Timor-Leste hodi nune’e bele hadi’a duni kondisaun real iha Timor-Leste ne’e, no mós bele investe di’ak liután no barak liu iha área saude, edukasaun, abitasaun, no infraestrutura bázika sira seluk”.
Xanana Gusmão informa mós katak, liu hosi Planu Estratejikú Dezenvolvimentu, ne’ebé lansa iha fulan Jullu liubá, sensus ne’e fó sentidu di’ak liu ba progresu rai ne’e ninian,no hodi define politika no programa ne’ebé presiza ba dezenvolvimentu nasionál ho planu ida ne’e, ne’ebé bele reprezenta aspirasaun povu timor tomak nian iha dezenvolvimentu nasionál ba tinan ruanulu oin mai haree ba área prinsipál tolu mak Kapitál sosiál, infraestrutura, no dezenvolvimentu ekonomikú.
Iha fatin hanesan Ministra Finansa Emilia Pires, hateten katak Governu liu hosi Ministériu Finansa iha tinan 2010, liu hosi Diresaun Nasionál Estatístika halibur ona informasaun kona-ba ita nia populasaun iha Timor-Leste nia laran tomak, hosi distritu ba distritu, suku ba suku, no uma- kain ba uma-kain.
Marka prezensa iha lansamentu Sensus Fo Fila Fali ne’e,Primeiru-Ministru Kay Rala Xanana Gusmão, Ministra Finansa, Emilia Pires, Prezidente Tribunal Rekursu, Claudio Ximenes, Prokurador-Jerál Repúblika, Ana Pessoa Pinto, Reprezentante Sekretáriu-Jerál ONU nian iha Timor-Leste, Ameraah Haq, Reprezentante Parlamentu Nasionál, Deputadu Natalino dos Santos, Prezidente Komisaun Funsaun Públika, Liboriu Pereira, UNICEF, Reprezentante UNFPA, Pornchai Suchitta, Membru Governu, ONG Internasionál no Nasionál.
