Governu Timor-Leste

Ministériu Finansa Timor-Leste, Banku Desenvolvimentu Aziátiku (BDA) no AusAID, iha sesta-feira, loron 28 fulan Outubru, iha Edifisiu Ministériu Finansa nian, asina  akordu  hamutuk ida hodi fornese bee moos ba kapitál distritu Manatutu no Pante Makasar, Distritu Oe-Kusse.

Ministra Finansa, Emília Pires, iha nia intervensaun hatete katak, “ohin ita asina akordu gratuitu ho Banku Desenvolvimentu Aziátiku, no AUSAID ho orsamentu montante milliaun $11 atu ajuda  Ministériu Infraestrutura liu hosi Departamentu bee moos hodi fasilita bee ba ita nia komunidade sira iha kapitál Distritu Manatutu no Pante Makasar, Distritu Oe-kusse.”

Ministra hatutan tan “ha’u hein katak liu hosi ajuda hirak ne’ebé ita nia Ajénsia Banku Dezenvolvimentu  Aziátiku fasilita ne’e, komunidade sira iha distritu Manatutu nomós pante makasar, iha tinan 2014 bele hetan bee moos gratuitu ona. Tanba ne’e nia fiar katak projetu sira ne’e kuandu la’o di’ak ona,bele  hala’o mós ba iha distritu sira seluk. Projetu ne’e sei hahú implementa iha tinan 2012 no sei hala’o mós iha área Debu, Lehumo iha Eraulo, Distritu Ermera.

Iha parte seluk Reprezentante Banku Dezenvolvimentu Aziátiku iha Timor-Leste, Craig Sugden, informa mós katak, fundu ne’ebé BDA fó ne’e hodi finansia projetu fornesementu bee moos ba kapitál distritál sira hodi kontribui ba redusaun moras ne’ebé iha relasaun ho bee, liu-liu ba labarik sira menus hosi tinan lima. Projetu ne’e sei rehabilita no alarga sistema formesimentu bee moos iha Manatutu no Pante Makasar  atu nune’e iha utilizasaun bee tenke iha efisiénsia no prátika ijiéne ne’ebé seguru.

Marka Prezensa Iha Asina Akordu mak Ministra Finansa, Emilia Pires, Visé Ministru Finansa Rui Hanjam, Reprezentante Minister Counsil AUSAID Vincent Ashcroft, Reprezentante BDA iha Timor-Leste, Craig Sugden no Diretór sira hotu ministériu Finansa nian.