Governu Timor-Leste

Sekretaria Estadu Formasaun Profisionál no Empregu (SEFOPE), servisu hamutuk ho Governu Brazil, iha loron 13 fulan Outubru, hala’o sorumutu ida hodi aprezanta aprovasaun ba Termu Referénsia ba Komisaun Nasionál Kontra Traballu Labarik (KNKTL).

Aprovasaun Termu Referénsia ne’e hanesan resposta direta Timor-Leste nian ba prevensaun no eliminasaun Traballadór Labarik ho ninia forma ne’ebé grave, nune’e mós hanesan pasu dahuluk ida ba estabelesimentu ofisiál ba komisaun ne’e.

Sekretáriu Estadu Formasaun Profisonál no Empregu, Bendito Freitas, rekoñese katak “realidade labarik barak mak envolve iha vida servisu. Ho razaun aspetu ekonomia família fraku, sosiál, kultura no seluk tan. Labarik sira iha direitu atu hetan tempu livre ba eskola no halimar ho labarik maluk seluk iha uma, viziñu, eskola fatin. Governu, Estadu, sosiedade tomak iha direitu atu proteje labarik tanba sira mak ita nia futuru nasaun nian”.

SEFOPE iha ninia parseiru mak Organizasaun ba Empregadór no Traballadór sira, ho apoiu hosi ILO no Governu Brazil, serbisu hamutuk ona hodi estabelese mós Komisaun Nasionál ida Kontra Traballadór Labarik (CNTI).

CNTI sei envolve instituisaun 15 husi Governu no Parseiru Sosiál no sei koordena liu hosi SEFOPE. Komisaun ne’e sei monitoriza progresu ba prevensaun no eliminasaun Traballadór Labarik sira hanesan estabelese ona iha Konvensaun C182 ILO nian kona-ba Forma Traballadór Labarik ne’ebé grave. Ida ne’e inklui, dezenvolvimentu Planu Asaun Nasionál ida, dezenvolvimentu lista servisu sira ne’ebé perigozu no bandu ba labarik sira ho idade seidauk to’o tinan 18 no propoin polítika sira hodi bele proteje direitu labarik no ema boot sira nian.