Primeiru-Ministru hatete misaun Forsa Seguransa Internasionál nian hotu iha 2012
Primeiru-Ministru Kay Rala Xanana Gusmão, nu’udar mós Ministru Defeza no Seguransa, iha konferénsia ba imprensa iha Aeroportu Internasionál, Prezidente Nicolau Lobato, Díli, iha sexta-feira, loron, 21 fulan Outubru, hateten misaun Forsa Seguransa Internasionál (FSI) sei hotu iha tinan 2012.
“Kalendáriu ne’e haksesuk ona iha Nasoens Unidas no ha’u rasik aprezenta ona ba Sekretáriu Jerál ONU nian kona-ba kalendáriu tranzisaun ne’e, misaun UNMIT ho FSI ne’e pakote ida de’it, misaun rua ne’e sei hotu iha 2012”, esplika Primeiru-Ministru.
Xanana Gusmão, hato’o afirmasaun ne’e hodi hatán ba deklarasaun hosi Xefi Estadu Maiór Jenerál Forsa Armada Austrália nian, David Hurley, ne’ebé hateten “FSI sei la retira tuir kalendáriu ne’ebé previstu iha tinan 2012 ho razaun katak iha tinan oin atu tama ona ba eleisaun prezidensiál no lejislativa, no Timor-Leste sei hasoru pontu kritiku” (tuir notisias hosi Ajensia Lusa, sexta-feira, loron 20 fulan Outubru 2011).
Iha oportunidade hanesan Primeiru-Ministru husu mós ba populasaun tomak,iha foho no vila atu moris hakmatek labele monu ba violénsia, hodi kontribui ba sira (FSI) sai lalais, lalika monu ba buat sira ne’ebé mak sei la kontribui ba pás no estabilidade.
