Timor-Leste no Xina hametin kooperasaun iha área Defeza
Governu Timor-Leste, liu hosi Sekretaria Estadu Defeza, iha loron 19 fulan Outubru, iha gabinete Sekretaria Estadu Defeza nian, hala’o sorumutu Bilaterál ho Delegasaun Ministériu Defeza Xina nian ne’ebé lidera hosi Maijór Jenerál Forsa Defesa Xina, Qian Lihua, ho objetivu atu hametin liután kooperasaun iha Área Defeza nian iha futuru.
Sekretáriu Estadu Defeza, Júlio Tomás Pinto, Informa katak “vizita Ministeriu Defeza Xina nian ne’e importante tebes mai Timor-Leste hodi hametin kooperasaun bilaterál entre Nasaun rua ne’e. Alende ne’e asina mós akordu ida ho Xina hodi fó apoiu gratuitu mai Estadu Timor- Leste, liu hosi lanxa rápida no kareta móvel atu hadi’a ró nian ba Komponente navál F-FDTL”.
Júlio Tomás Pinto hatutan, “Xina durante ne’e fó sinal pozitivu iha parte rekursu umanu nian, tanba sira iha hanoin di’ak atu bele koopera ho ita, entermus infraestrutura nian. Tanba ne’e sira husu mós mai ita atu bele iha vizita esterna entre lider militar Nasaun rua nian hodi fahe informasaun ba malu liu hosi esperiénsia Xina nian iha kombate ba problema dezastre”, tenik nia.
Partisipa iha sorumutu bilaterál ne’e alende Sekretáriu Estadu Defeza, Júlio Tomas Pinto no Maijór Jenerál Xina, Qian Lihua, marka prezensa mós Embaixadór Xina Iha Timor Leste,Fu Yuan Cong, Koronel Koliati, Maijór Adão Brito no Diretór Jerál Sekretaria Estadu Defeza, João Corte-Real.
