Governu Timor-Leste

Primeiru-Ministru Kay Rala Xanana Gusmão, iha konferénsia ba imprensa iha Aeroportu Internasionál, Prezidente Nicolau Lobato, Díli, iha sexta-feira, loron, 21 fulan Outubru 2011, hafoin fila hosi vizita ba Sudaun Sul, hateten Rai sira ne’ebé hola parte ba g7+ sei lori ajenda “Objetivu ba konstrusaun Páz no Estadu nian” ba sorumutu ho rai riku sira iha Koreia du Sul iha Novembru tinan ida ne’e.

“Tuir ajenda MDG - Millennium Development Goals (Objetivu ba konstrusaun Páz no Estadu nian) nian, Rai ki’ik sira sei la hetan benefisiu tanba laiha Rai ida mak bele kumpri  objetivu ne’ebe maka estabelese ona iha MDG’s to’o tinan 2015, tan ne’e iha surumutu Busan, Koreia du Sul, fulan Novembru tinan ida ne’e sei halo surumutu mós ho grupu G20 nian, no iha biban ne’eba rai sira ne’ebé hola parte ba g7+ sei apresenta mós ninia ajenda ba desenvolvimentu maka “Objetivu ba konstrusaun Páz no Estadu nian”nu’udar alternativa ba MDG’s”, esplika Primeiru-Ministru.

Primeiru-Ministru hatutan tan, molok atinji MDG’s, rai ki’ik sira ne’e tenke estabelese uluk mekanismu instituisaun nian kona-ba konstrusaun ba Paz no Estadu hafoin bele atinji ba objetivu desenvolvimentu Millenium (MDG’s).