SEJD organiza Programa Interkámbiu ba juventude
Sekretaria Estadu Joventude no Desportu iha loron 10 fulan Outubru tinan ida ne’e organiza programa interkámbiu iha Distritu Baucau, ne’ebé partisipa hosi foin sa’e sira hamutuk ema nain 336.
Foin sa’e sira ne’e mai husi distritu sanulu resin tolu (13) hanesan Distritu Dili ema nain 26, Manatutu 63, Baucau, 100, Lospalos, 25, Covalima, 21, Ainaro, 12, Manufahi 16, Oe-cusse 15, Liquiça 14, Aileu 14, Ermera 14 no Vikeke 16.
Sekretáriu Estadu Juventude no Desportu, Miguel Manetelo iha ninia intervensaun hateten, programa Interkámbiu ne’ebé hala’o ho objetivu atu halo intereksaun sosiál entre juventude hosi distritu ida no distritu seluk. “Hein katak, juventude sira ne’ebé hetan oportunidade hodi partisipa iha programa ne’e bele aproveita ho didi’ak atu nune’e bainhira fila fali ba idaidak nia Distritu bele fahe fali buat ne’ebé sira hetan ba juventude sira seluk ne’ebé mak la patrisipa iha atividade ne’e.
Miguel Manetelo hatutan: “Programa Interkámbiu ne’ebé realiza iha distritu Baucau hanesan programa tinantinan Sekretaria Estadu Juventude no Desportu nian. Ne’e duni programa primeiru hala’o ona iha Oe-cuse iha tinan2009, tuir fali Maliana (2010) no ba datoluk nian mak iha Baucau”.
Francisco Lopes, reprezentante juventude husi Distritu Covalima sente kontente ho programa Interkámbiu ne’e, tamba bele halibur juventude husi Distritu sanulu resin tolu (13), hodi bele troka hanoin ba malu, hatene kultura husi distritu ida no distritu seluk no mós hametin liután relasaun entre juventude sira.
