Governu Timor-Leste

Prezidente Parlamentu Nasionál, Fernando Lasama de Araujo, akompaña hosi Sekrétariu Estadu    Juventude no Desportu , Miguel Manetelu, iha loron 5 fulan Outubru, husik atleta Timor-Leste nian ba  Indonézia hodi hala’o preparasaun (Try Out) durante fulan ida molok hasoru eventu Sea Games ba dala XXVI, ne’ebé sei hahú iha loron 11 to’o 22 fulan Novembro, iha Indonézia.

Atleta sira ne’e kompostu husi modalidade sanulu resin-rua, hanesan, Taekwondo, iha atleta nain  8, Karatedo nain 9, Tenis Meja nain 5, Silat Timor-Leste nain 13, Badminton nain 5, Boxing atleta nain 8, Foti Besi nain haat 4, Voleiból nain 7, Atletizmu  nain 9 no Futeból  sanulu resin-haat, Ciklista nain 5 no modalidade Kempo hamutuk atleta nain 16.

Sekrétariu Estadu Juventude no Desportu, Miguel Manetelu, iha serimónia despedida ho atletas sira, husu atu atleta sira utiliza tempu fulan ida nia laran hodi halo preparasaun ho didi’ak, atu nune’e bele lori rezultadu di’ak iha eventu Sea Games.

Iha biban ne’e Prezidente Parlamentu Nasionál, Fernando Lasama de Araújo, husu ba atleta sira labele hanoin buat seluk iha ulun hodi fo impaktu ba konsentrasaun iha kompetisaun, tenke ba  ho intensaun no hanoin ida katak, tenke lori medalla mai Timor-Leste no sekarik lakon tenke ho dignidade, Imi ne’ebé  bá reprezenta Nasaun no povu Timor-Leste, ne’e duni tenke hametin dixiplina maka’as durante tempu Try Out  to’o eventu Sea Games hahú .

Entretantu  António Manuel, atleta husi modalidade Kempo reprezentante atleta ne’ebé  partisipa iha eventu Sea Games ne’e, promete sei aproveita tempu Try Out durante fulan ida nia laran ho di’ak  nune’e bele kontribui medalla  ruma mai  Timor-Leste.