SEFOPE haruka formandu 50 tuir formasaun iha área marítima
Sekretária Estadu Formasaun Profesionál no Empregu (SEFOPE), iha loron 3 Outubru 2011, haruka formandu sira hamutuk 50 ne’ebé mak atu bá tuir formasaun Auto-báziku (Basic Self Training) iha área marítima nian durante fulan ida, iha Jakarta, Indonézia.
“Investimentu iha área marítima nian, iha ponténsia bo’ot ba futuru hodi dezenvolve no proteje riku-soin tasi nia, liuliu iha tasi-mane. Agora daudaun seidauk iha kampu servisu ne’ebé sustentável, maibé iha futuru fiar katak parte kosta sul sei persiza rekursu umanu lubun bo’ot atu responde ezijénsia merkadu indústria nian”, hateten Sekretáriu Estadu Bendito Freitas.
Tuir Planu Estratéjiku Dezenvolvimentu iha futuru, SEFOPE servisu hamutuk Sekretaria Estadu Rekursu Naturais (SERN), atu loke Eskola Politéknika ba área marítima nian iha Distritu Covalima, tanba ne’e, husu ba formandu sira atu aproveita didi’ak durante iha formasaun, ho nune’e bele sai fali instrutór ba formasaun iha área marítima nian iha futuru, tenik nia.
Programa ne’e hala’o tiha ona iha tinan 2009, ne’ebé haruka ona ema nain 10 maka bá tuir formasaun iha área marítima no hetan apoiu hosi fundu parseriu hanesan SEFOPE, SERN no ILO (International Labour Organization).
