Ministériu Saúde asina Nota Entendimentu ho FHFNZ
Ministériu Saúde, ne’ebé reprezenta hosi Diretór Jerál Agapito da Silva Soares, iha loron 5 fulan Outubru, asina Nota Entendimentu ho The Fred Hollows Foundation New Zealand (FHFNZ) ne’ebé reprezenta hosi Amanda Whyte Country Manager kona-ba kontribuisaun, responsabilidade no direitu hosi parte rua hodi hala’o Planu Dezenvolvimentu Forsa Traballu (PDFT) FHFNZ ninian.
“Iha Nota Entendimentu ne’e parte rua konkorda katak, sidadaun Timor-Leste tenke hetan asesu ba nível kuidadu matan ne’ebé sufisiente atu asegura matan di’ak, saudável no servisu atu halakon matan aat ka moras ne’ebé bele evita liu hosi medida sira, preventiva, reabilitasaun no kurativu ninian”,hateten Agapito da Silva.
FHFNZ nia servisu mak atu kontrola moras matan no halo tratamentu ba matan aat sira, liu hosi fasilidade prestasaun servisu klíniku, dezenvolvimentu forsa traballu ba matan, edukasaun no promosaun ba saúde matan no apoiu ba setór matan. Ministériu Saúde servisu atu fó kuadru orientasaun polítika, programa no servisu ba dezenvolvimentu no prestasaun kuidadu matan nian, hatutan Agapito.
