MSS hetan materiál eskritóriu no audio visuál
Ministériu Solidariedade Sosiál, iha loron 22 fulan Setembru 2011, dala ida tan hetan ajuda materiál eskritóriu no audio visuál hosi Organizasaun Internasionál ba Migrasaun (OIM), hanesan kadeira, eja, armáriu, Kámera video, kámera dijitál, komputadór Macintosh, impresora no motorizada.
Organizasaun Internasionál ba Migrasaun hanesan parseiru dezenvolvimentu ida ba programa MSS nian, liuliu iha parte reintegrasaun deslokadu sira no vitima dezastre naturál.
Ministra Solidariedade Sosiál, Maria Domingas Fernandes Alves iha serimónia entrega ekipamentu sira ne’e hateten katak, “tanba haree ba susesu ne’ebé ministériu hetan liu-liu iha reitingrasaun ba deslokadu sira ba sira nia Bairu, mak OIM foti desizaun fó apoiu ekipamentu eskritóriu no audio vizuál sira ne’e mai MSS”.
Ministra ne’e hatutan tan katak hahú kedas iha prosesu reintegrasaun deslokadu iha tinan 2007 no taka iha tinan 2010, ita liu hosi faze ida defísil tebes, ita hanoin katak reintegrasaun, ita taka de’it kampu deslokadu, maibé, iha prosesu, ita tenke fó mós rekooperasaun no seluk tan, ne’e prosesu ida ne’ebé kompleksu tebes, iha mós projetu komunitáriu hanesan halo saneamentu, bee moos, mini estadiu, estrada kiik oan, sentru komunitáriu sira no eskola sira, no ikus liu mak atu asegura rekonsiliasaun, ne’ebé presiza konvense no harmoniza fila fila ema sira ne’ebé ita reintegra ho sira ne’ebé iha Bairu laran.
Iha fatin hanesan Xefe Missaun OIM iha Timor-Leste, Norberto Celestino hateten katak “ekipamentu sira ne’e entrega ba Ministériu Solidariedade Sosiál bazeia ba akordu entre MSS no OIM iha enisíu ba prosesu reintegrasaun IDPs ba sira nia hela fatin, no mós halo Telenovela Suku Hali hodi hatudu ba povu katak ita timor-oan mós bele halo telenovela no filme.
Partisipa iha serimónia ne’e, Sekretáriu Estadu Asisténsia Sosiál no Dezastre Naturál, Jacinto Rigoberto Gomes de Deus, Diretór-Jerál MSS, Eugénio João Amado de Maria Soares, Diretór Nasionál sira, Xefe Departamentu sira no funsionáriu MSS nian.
