Governu Timor-Leste

Governu Timor-Leste, liu hosi Ministériu Administrasaun Estatál no Ordenamentu Territóriu ho Governu Austrália liu hosi AusAID entrega sertifikadu kursu kona-ba programa Dezenvolvimentu Kapasidade iha Setór Públiku ba funsionáriu sira hamutuk ema nain 68, iha tersa-feira loron 13 fulan Setembru, iha Ótel Timor.

Sekretáriu Estadu Reforma Administrativa (SERA), Florindo Pereira iha nia diskursu hateten katak, “Timor presiza formasaun jestaun ba formadór sira, atu nune’e sira bele fó fali formasaun ba maluk sira seluk bazeia ba saida mak sira hetan ona iha prosesu formasaun nian”.

Florindo Pereira ne’e mós salienta tan katak, programa ne’e di’ak no sei hala’o nafatin, maibé formadór sira tenke halo uluk avaliasaun mak foin prepara manuál hanorin nian, atu sira bele  hala’o formasaun tuir nesesidade instituisaun ne’ebé iha.

Formandu sira ne’e mai hosi Institutu Nasionál Administrasaun Públiku, Sekretaria Estadu Formasaun Profisionál no Empregu, Ministériu Solidariedade Sosiál, Sekretaria Estadu Joventude Desportu, Ministériu Iinfrasestrutura, Ministériu Ekonomia no Dezenvolvimentu, Ministériu Turizmu Kormésiu no Industria, Sekretaria Estadu Promosaun Igualdade, Sekretaria Estadu Konsellu Ministru, Ministériu Justisa, Bibleoteka Ermera, Ministériu Edukasaun no Fundasaun Kristál

Marka prezensa iha serimónia entrega sertifikadu ne’e mak hanesan Sekretáriu Estadu Reforma Administrativu, Florindo Pereira, Xefe Programa AusAID iha Timor-Leste, Vincent Ashcroft, Maneger Center For Vet Practice hosi Swinburne University of Technology Austrália, Jillan Slater no Partisipante sira mai hosi Timor Leste Public Sector Capacity Development Program (PSCDP).