Primeiru-Ministru Inaugura Sentru Rejionál MTKI iha Oe-Kusse
Primeiru-Ministru, Kay Rala Xanana Gusmão akompaña hosi Prezidente Parlamentu Nasionál, Fernando Lasama de Araújo no Ministru Turizmu Komérsiu no Indústria, Gil da Costa Alves, iha loron 30 fulan Agostu, inaugura edifísiu sentru rejionál MTKI nian iha Enklave Oe-Kusse.
Primeiru-Ministru, Kay Rala Xanana Gusmão, iha nia intervensaun ba serimónia inaugurasaun sentru Rejionál Ministériu Turízmu, Komérsiu no Industria nian ne’e, husu ba responsávél Sentru ne’e nian atu bele utiliza fatin ne’e ho efisiénsia no fó atensaun ba manutensaun, atu nune’e bele apoia Governu nia programa sira kona-ba Turízmu, Komérsiu no Indústria, iha Enklave Oe-Kusse, nune’e mós implementa reforma saida de’it mak nu’udar ezekutivu ne’e tau iha prioridade.
Iha fatin hanesan Prezidente Parlamentu Nasionál, Fernando Lasama de Araújo, elojia Kompañia ne’ebé responsabiliza ba obra ne’e tanba remata ho kualidade no hatudu hanesan ezemplu ba emprezáriu sira seluk atu banati tuir, hodi ajuda Governu bele implementa nia programa sira.
Ministru Gil da Costa Alves, iha nia diskursu esplika katak, Sentru Rejionál ne’e harii ho objetivu atu fasilita, intensifika no desentraliza servisu Ministériu nian iha Distritu Oe-Kusse, atu nune’e bele atende di’ak liután nesesidade komunidade Enklave nian kona-ba servisu ne’ebé relevante.
Konstrusaun ba Sentru Rejionál Oe-Kusse, Ministériu Turísmu, Komérsiu no Indústria aloka orsamentu hamutuk Dolar rihun atus ida ualu.
