Governu Timor-Leste

Komisaun Funsaun Públika termina ona ninia programa fó Pose ba funsionáriu temporáriu ba Permanente hamutuk ema nain 1,344, kompostu hosi Distritu Bobonaro, funsionáriu hamutuk ema nain 784 no Distritu Oe-Kusse hamutuk funsionáriu, 560, iha loron 1 to’o loron 2 fulan Setembru.

Prezidente Komisaun Funsaun Públiku, Libório Pereira, hateten katak, “Distritu rua ne’e hanesan Distritu ikus liu, hosi programa Komisaun Funsaun Públiku nian, ne’ebé bazeia ba Rezolusaun n.° 42/2010, loron 17 fulan Novembru, hodi konverte funsionáriu temporáriu sira ba permanente hamututuk 13.227 iha Timor laran tomak. Serimónia fó pose ne’e, ho intensaun atu koloka funsionáriu iha sira nia pozisaun ho dignidade”.

Libório Pereira husu mós ba funsionáriu sira ne’ebé mak simu pose ohin atu sai servidór Estadu nian, tanba funsionáriu ne’e hanesan Estadu nia atan, tanba ne’e funsionáriu hotu-hotu tenke kumpri, hodi hala’o servisu ho didi’ak, atu dezenvolve ita nia Nasaun”.

Administradór Distritu Bobonaro, Domingos Martins, iha nia intervensaun hateten, “uluk iha temporáriu no permanente, maibé ohin ita boot sira tama ba modalidade ida de’it permanente,   ha’u husu ba ita boot sira ne’ebé ohin simu ona pose sai funsionáriu la’ós hodi servi ba grupu ida, funsionáriu ne’e iha pozisaun firme, atu nune’e povu la hateten ita katak, funsionáriu ida ne’e halis ba ida ne’ebá, ne’e la’ós funsionáriu públiku, husu mós ba Diretór Distritu ne’ebé mak durante ne’e servisu hamutuk ho ha’u nu’udár Administradór Distritu katak, Administradór Distritu la’ós ukun mesak, Administradór Distritu reprezenta Governu iha distritu ida ne’e atu bele koordena departamentu deskonsentrasaun ne’ebé mak iha distritu ida ne’e, ne’e ha’u nia knaar, ha’u-nia funsaun laos atu manda departementu hosi ministériu sira nian, maibé atu halo koordenasaun deit”.

Iha Distritu Oe-Kusse Administradór José Anuno, informa katak, “Ami agradese ba  Governu tanba bele fó kontratu ba ami-nia funsionáriu sira ho saláriu oi-oin deit, ne’ebé mak regula iha lei funsaun públika hahú hosi nivel um (1)  to nivel  sete (7) no mós agora bele foti fali sira sai hanesan funsionáriu permanente. Funsionáriu sira ne’ebé ohin simu pose ne’e, balun servisu tinan sanulu ona, balun liu hosi tinan sanulu (10), funsionáriu liuliu sira ne’ebé mak hanesan professór.