Governu Timor-Leste

Ministériu Solidariedade Sosiál, liu hosi Sekretaria Estadu Asisténsia Sosiál no Dezastres Naturais, iha loron 5 fulan Setembru 2011, hetan apoiu husi  Programa Dezenvolvimentu Nasoens Unidas nian “PNUD” hanesan, Motorizada 13, Laptop del (13), Printer (15), Projetór (1),  Jeradór Kipór (1), T3G (15), Telemóvel (9), Servedór ba bazededadus benefisiáriu (1), inklui selu mós saláriu ba funsionáriu pontu fokál sira iha hamutuk 13 ne’ebé servisu iha Distritu sira no mós fó kontratu ba asesór nasionál ida no Internasionál ida.

Sekretáriu Estadu Asisténsia Sosiál no Dezastres Naturais, Jacinto Gomes de Deus, iha serimónia simu ekipamentu sira ne’e, fó agradesimentu ba PNUD, ne’ebé durante ne’e fó apoiu  máximu ba Governu liuliu ba Ministériu Solidaridade Sosiál. Aleinde ne’e tuir Sekretáriu Estadu, apoiu ne’e atu fasilita servisu programa Bolsadamain iha futuru no mós atu hala’o lansamentu ba programa Rejistu Sosiál Uniku ba benefisiáriu sira ba Bolsadamain.

Jacinto Gomes de Deus informa liután katak, programa Bolsadamain implementa dezde tinan 2008 to’o agora, benefisiáriu sira hamutuk rihun sanulu resin lima (15.000), oras ne’e tempu ona ita atu alarga tan no modifika programa ne’e diak liután. Tanba ne’e MSS hala’o lansamentu rejistu sosiál uniku, hodi bele identifika loloos familia vulneravél sira hanesan inan solteira iha oan nain hira, husi oan nain hira ne’e bele hetan mós dirétu ba programa ne’ebé refere. Nune’e mós Sekretáriu Estadu, husu ba Pontu Vokál programa Bolsadamain, atu kuidadu didi’ak  ekipamentu sira  ne’ebé ohin simu hodi bele fasilita servisu ne’ebé ohin loron ita boot sira simu husi ministériu.

Pontu vokál Distritu Covalima, Nelson de Jesus hateten katak, nu’udár timór-oan sei hala’o knaar ida ne’e tuir kapasidade ne’ebé nia iha hodi bele servi di’ak liu tan ita-nia maluk vulneravél sira, liu-liu inan no oan kbi’it la’ek sira. Ami kontente tanba Govenu fó ona fiar mai ami atu hala’o knaar ida ne’e, ami mós simu ho responsablidade atu bele servisu ho diak.

Nune’e mós Luiza Fernandes pontu vokál  husi Distritu Lautém sente kontente tanba Governu apoiu ona ami atu hala’o servisu ida ne’e ho di’ak tuir kontratu ne’ebé iha.

Partisipa iha serimónia entrega ekipamentu sira ne’e, Diretora Diresaun Nasionál Reinsersaun Sosial, Carmen da Cruz, Adjunta Diretora husi PDNU, Noura Hamladji, Xefe Departamentu Protesaun Labarik no Inan Vulneravel, Florenço Gonzaga Xefe Departamentu Komunikasaun Sosiál, João Bosco de Jesus Mendonça, Asesór, funsionáriu sira no ponto vokál hosi Distritu 13.