Konferénsia Nasionál kona-ba Rádiu Komunidade
Sentru Rádiu Komunidade(SRK) nu’udar parte ida hosi Sekretaria Estadu Konsellu Ministrus organiza Konferénsia Nasionál ba Rádiu Komunidade nian durante loron rua hahú hosi loron 6 to’o 7 fulan Setembru 2011, iha Sentru Treinamentu ba Profesór sira, eis CNRT, Balide, Díli
Objetivu prinsipál hosi konferénsia loron rua ne’e mak hanesan, atu kumpreende situasaun média iha Timor-Leste no kontribuisaun Rádiu Komunidade nian iha prosesu harii nasaun, hafoun fila fali prinsipiu Rádiu Komunidade no planu partisipasaun no apoiu hosi komunidade ba sustentabilidade Rádiu nian.
Vise Primeiru-Ministru José Luis Guterres, iha ninia intervensaun hodi loke konferénsia ba loron dahuluk nian ne’e hateten, “Governu prontu fó apoiu ba Rádiu Komunidade, tanba papél Rádiu Komunidade importante tebes hodi bele fahe informasaun ba komunidade sira kona-ba programa saida mak Governu hala’o ona no ida ne’ebé mak sei hala’o, tanba ne’e governu sei iha posibilidade atu fó tulun bá Rádiu Komunidade sira hotu, maibé durante ne’e Governu liu hosi Sekretaria Estadu Konsellu Ministrus fó ona ajudu hanesan ekipamentu Rádiu nian,halo Manutensaun ba Rádiu Komunidade sira hotu no halo rehabilitasaun ba torre Rádiu Komunidade nian iha Distritu Lauten.
José Luis haktuir tan katak, Rádiu Komunidade importante tebes ba prosesu dezenvolvimentu kulturál hodi lori informasaun liu hosi lian eransa komunidade nian, aleinde ne’e Rádiu Komunidade iha papél importante seluk atu halo prezervasaun, no desenvolvimentu ba lian lokál hanesan rikusoin Timo- Leste nian.
Diretór Sentru Rádiu Komunidade, Luis Evaristo Soares, afirma katak, Governu liu hosi Sekretaria Estadu Konsellu Ministru hahú ona fó tulun ba Rádiu Komunidade sira hotu ho ekipamentu ne’ebé naton ho nune’e sira bele hala’o sira nia knaar atu fahe informasaun ne’ebé edukativu ba komunidade sira no komunidade bele sente katak, sira mós partisipa iha dezenvolvimentu Nasaun ida ne’e ninian.
Reprezentante Rádiu Timor-Leste Rosáio Martins hateten katak, Parseiru Rádiu Timor-Leste ho Rádiu komunidade Importante tebes,tanba bele fahe informasaun ba Komunidade sira liu hosi programa direta Rádiu Timor-Leste nian ba Rádiu Komunidade tomak iha Teritóriu Tomak.
Partisipa iha konferénsia ne’e Vise Priméiru Ministru Jose Luis Guterres nu’udar Mós Priméiru Ministru Interinu,Vise Reprezentante Sekretariu Jerál Nasõens Unidas iha Timor-Leste Finn Reske-Nielsen, UNICEF, WHO, Search For Common Ground, no partisipante sira hosi Rádiu Komunidade sira hotu ne’ebé mak eziste iha Timor-Leste.
