Governu Timor-Leste

Ministériu Turízmu, Komérsiu Indústria, liu husi Diresaun Nasionál Indústria, hamutuk ho benefisiáriu sira, asina ona, loron 6 fulan Setembru, kontratu hodi fó apoiu ba implementasaun  programa tuir proposta ne’ebé sira aprezenta ba Diresaun Nasionál Indústria MTCI nian ne’e. Tuir Diretór Nasionál Indústria, António de Araújo, informa katak iha grupu 136 ne’ebé mai  husi distritu 13.

Hafoin halo tiha ezekusaun ba orsamentu ne’ebé fó husi Ministériu, benefisiáriu sira ne’e tenke hato’o relatóriu kona-ba sira nia atividade, atu nune’e bele fasilita Ministériu hodi verifika rezultadu.

Ministru Turízmu, Komérsiu no Indústria, Gil Alves iha nia intervensaun esplika katak atividade ne’e hanesan mós programa ida Governu Konstitusionál ba Dahaat nian ho  objetivu atu apoia komunidade iha dezenvolvimentu atividade indústria kiik, ne’ebé bele ajuda hasa’e sira nia nível ekonomia.

Ministru fó hanoin ba benefisiáriu sira atu sai kreativu liu tan iha implementasaun programa, tamba rezultadu katak sei fó benefísiu ba nia aan-rasik, hodi labele depende de’it ba Governu.

Carlos B Soares, nu’udar responsável ba “ Indústria Haburas Tahu Tempe”, hanesan mós benefisiáriu ida, hatudu nia haksolok ho programa Ministériu nian no nia promete katak sei haka’as an  hodi bele ezekuta orsamentu ne’ebé Governu fó tuir proposta ne’ebé mak nia hato’o.

Serimónia asinatura kontratu ne’ebé hala’o tiha ona iha Sentru Konvensaun Díli, konta ho prezensa Inspetór no Diretór sira husi Ministériu Turízmu, Komérsiu no Indústria.