Governu Timor-Leste

Ministériu Turízmu, Komérsiu no Indústria, liu hosi Diresaun Nasional Turízmu fó fi’ar no suporte ba kompañia Cámara Enterprise, hodi realiza feira hanaran “Feira Loro-kraik Kristu Rei”, ne’ebé sei halo nia abertura iha Sesta-feira (26/08), iha área Kristu Rei, Díli.

Feira ne’e sei loke to’o fulan Dezembru kada loron Sesta-feira, Loro-kraik, tuku 5 to’o tuku 10 kalan. Iha Feira Loro-kraik Kristu Rei sei prepara hahan furak, Artezanatu oi-oin ho kualidade di’ak no mós aprezentasaun kapa’as  no mós  feira ne’e atu haree kreatividade kualidade produtu lokál, hodi oinsá bele dezenvolve produtu lokál di’ak liután.

Tuir Diretór Nasionál Turízmu, José Dias Quintas hateten, Inisiativa loke feira iha área Kristu Rei ne’e, tanba  área Kristu Rei hanesan fatin koñesidu ne’ebé presiza tebes atu promove di’ak liután. Tanba turísmu nu’udar setór importante iha nasaun ida nia laran atu bele apoia reseita estadu nian, hodi ajuda setór privadu atu atrai turista sira no mós bele dezenvolve setór privadu nia an.

Diretór ne’e mós hatutan tan katak, Diresaun Nasional Transporte (DNTT), sei loke dalan mikrolet ida hosi Bidau ba to’o Kristu Rei, nune’e bele fasilita komunidade sira ba hala’o vizita iha Feira ne’e, kada pasajeiru sei selu mikrolet ne’ebé prepara ona ba-mai sentavu haatnulu. Aleinde ne’e sei halo mós kontratu ho Taxi balun atu nune’e bele halo operasaun iha kalan. Sei prepara mós regulamentu ida atu pasajeiru sira ne’ebé uza transporte públiku bele kontratu ona hodi uza bilete. Tuir regulamentu ne’ebé diskuti ona, transporte puúliku sei para de’it iha Areia Branka nune’e labele interrompe trâfiku .

“Susesu ba feira ne’e konta ho servisu hamutuk entre Diresaun Nasional Turízmu, Sekretaria Estadu Kultura, Polisia Nasionál Tmor-Leste, Diresaun Nasionál Transporte,Telekomunikasaun no Seguransa Sivil”, hatutan José Dias Quintas.