Governu Timor-Leste

Sekretária Estadu Promosaun Igualdade (SEPI), Idelta Rodrigues, loron 22 Agostu 2011 iha edifisiu SEPI, Palásiu Governu, Dili, ho Reprezentante Misaun nian Embaixada Irlanda iha Timor-Leste, Michael Shanahan, asina nota entendimentu kona-ba kolaborasaun entre Ministériu Negosiu Estranjeiru Irlanda liu hosi Diresaun Kooperasaun Dezenvolvimentu (Irish Aid).

Iha asina nota entendimentu ne’e, Irish Aid fó apoiu finanseiru ba programa “Suporte ba koordenasaun interministeriál liu hosi grupu traballu Jenéru”, ho valór hamutuk US$148,793.

Idelta Rodrigues, hateten katak, programa ne'e sei hasa’e kapasidade Grupu Traballu Jéneru Inter-Ministeriál ne'ebé sei forma hodi troka Pontu Fokál Jéneru Inter-Ministeriál nian.

“Durante ne'e iha kada Ministériu ita iha Pontu Fokál Jenéru, ho knaar ne’ebé ko’alia kona-ba asuntu hotu ne’ebé relasiona ho jéneru (gender mainstreaming) iha kada ministériu no distritu. Ami hakarak harii Grupu Traballu Jéneru para bele hakbiit liután esforsu ne'e. Grupu Traballu Jéneru iha kada ministériu ne'e sei lidera husi Diretór Jerál,” esplika Idelta Maria Rodrigues.

“Hahú hosi tinan 2002 kedas ami fó ona apoiu ba esforsu ne'ebé Governu Timor-Leste hala’o hodi promove igualdade jéneru iha nasaun ne'e,” tenik Michael Shanahan.

Programa ne'e sei hala'o hahú husi fulan Agostu 2011 ne'e.