Timor-Leste no Guiné Bissau sei hametin Koperasaun iha Área Defeza nian
Governu Timor Leste hala’o sorumutu ho Delegasaun Ministériu Defeza CPLP nian, ne’ebé diriji hosi Nasaun Guiné-Bissau,iha Loron 23 Agostu 2011, iha Palásiu Governu, Díli, Timor-Leste, hodi Hametin liutan kooperasaun iha Área Defeza Seguran nian iha futuru
Sekretáriu Estadu Defeza Júlio Tomás Pintu Informa katak “Delegasaun Ministru Defeza Guiné-Bissau mai hasoru malu ho Primeiru-Ministru nu’udar Ministru defeza no Seguransa Timor-Leste nian atu deskute oinsá mak atu estabelese kooperasaun entre rai rua iha área defeza no seguransa iha futuru.
Júlio Tomás Pinto hatutan tan katak, “Liu hosi sorumutu ida ohin Timor-Leste bele fahe nia esperénsia, liuliu iha parte reforma defeza no seguransa nian, tanba agora daudauk Guiné-Bissau mós harii ona ekipa ida para halo reforma defeza no seguransa iha sira nia rain, Timor-Leste bele fahe informasaun ba sira, kona-ba ita nia esperénsia durante tinan hirak nia laran iha área reforma defeza no seguransa.
Alendene xefe delegasaun Ministru Defeza Guiné-Bissau ne’e mós aprezenta sira nia proposta ida mai Timor-leste atu halo diskusaun téknika nian ho klean liu tan hafoin ita bele asina akordu kooperasaun iha área defeza nian.
“Iha sorumutu ne’e ita nia Primeiru-Ministru, Kay Rala Xanana Gusmão nu’udar veteranu ida hodi Timor-Leste nia naran no nu’udar Nasaun Maun Alin iha CPLP husu ba delegasaun Ministru Defeza Guiné-Bissau atu hapara violénsia no hahú ona ho referma seitór defeza no seguransa, atu nune’e bele lori dezenvolvimentu iha Guiné-Bissau”, hateten Sekretáriu Estadu.
