Governu Timor-Leste

Timor-Leste laos asumi de’it kompromisu interna sira, maibe asumi mós obrigasaun internasionál sira kona-ba ambiente. Ratifika ona Konvensaun oioin mak hanesan: Konvensaun Viena no nia Protokolu Montreal nian, Konvensaun Kuadru Nasoens Unidas kona-ba Mudansa Klimátika no Protokolu Quioto nian no Konvensaun Nasoens Unidas atu Kombate Dezertifikasaun, no sira seluk tan. Bainhira ratifika ona dokumentu hirak ne’e, país ne’e asumi ona obrigasaun oioin iha matéria ambientál katak presiza duni atu konkretiza obrigasaun hirak ne’e liu husi elaborasaun lei hirak ne’ebé permite atu kumpri obrigasaun hirak ne’e.

Defini daudaun baze ordenamentu jurídiku ambiente internu hodi integra mós konseitu direitu ambientál hirak ne’ebé bele simu iha internasional. Proposta Lei Baze ba Meiu Ambiente ne’ebé elabora daudaun ona sei submete ba Konsellu Ministru iha tinan ida ne’e duni atu hetan aprovasaun. Lei Baze ida ne’e sei konstitui baze jurídika orientadora ba kriasaun lejislasaun oioin no regulamentasaun komplementár fundamentál.

Lejislasaun ambientál importante balun tama ona iha vigor mak hanesan Dekretu-Lei kona-ba lisensa ambientál ne’ebé regula atribuisaun lisensa ambientál ba kualkér projetu sira( hanesan obra konstrusaun nian no intervensaun seluk ne’ebé fó impaktu diretu ba ambiente) nune’e mós nia fiskalizasaun ne’ebé garante prevensaun ba impaktu negativu ambiente nian no kontrolu ba poluisaun.

Iha ámbitu adaptasaun ba alterasaun klimátika, atu konklui daudaun preparasaun ba Programa Asaun Nasionál ba Adaptasaun(koñesidu ho NAPA). Ho programa ida ne’e sei introdús medida adaptasaun ba efeitu ne’ebé la favorese alterasaun klimátika no atu garante dezenvolvimentu ekonómiku ne’ebé sei hala’o ho forma sustentável.

Estratéjia no Planu Asaun ba Biodiversidade Nasionál ne’e hanesan ejijénsia husi Konvensaun Nasoens Unidas kona-ba Biodiversidade atu konklui daudaun no sei serve hanesan baze prinsipál medida sira nian ne’ebé sei foti relasiona ho konservasaun biodiversidade nian iha País.

Iha parte seluk, “Sekretaria Estadu Ambiente nian hala’o ona formasaun no kapasitasaun  rekursu umanu to’o agora hodi atrai partisipasaun funsionáriu sira iha konferénsia oioin, workshops sesaun formasaun sira iha rai-laran nune’e mós iha rai seluk. Atu bele sai duni nune’e, fundamentál tebe-tebes mak apoiu internasionál husi parte Noruega, Japaun no Indonézia nian ne’ebé sai ona nu’udar impulsionadór ba formasaun ita-nian rekursu umanu”, afirma Sekretáriu Estadu, Abílio Lima.

Reforsu institusionál dezenvolve to’o agora atu fó resposta efisiente liu no ba nivel espesializadu. Preokupasaun prinsipál ba matéria ne’e, hadi’ak daudaun liu husi kriasaun sistema tranzmisaun informasaun nian entre setór oioin nune’e mós kriasaun infraestrutura desentralizada ne’ebé bele hatán ba problema ambientál nian iha distritu oioin.

Servisu seluk ne’ebé importante mak Sekretaria Estadu Ambiente nian dezenvolve hela konsensializasaun populasaun nian ba problema degradasaun ambientál. “Asaun sensibilizasaun oioin ne’ebé hato’o ba públiku no liuliu ba distritu sira atu implementa ho objetivu mak atu eduka populasaun kona-ba prátika ambientál ne’ebé saudável no fó informasaun edukativa kona-ba problema hirak ne’ebé mosu kona-ba degradasaun ambientál, meiu sira atu kombate impaktu alterasaun klimátika, prevensaun dezastre, no sira seluk tan”, adianta Abílio Lima.

Aleinde atividade hirak ne’e, Sekretaria Estadu Ambiente nian realiza atividade seluk mak hanesan asaun fahe ai-horis ba distritu sira, harií viveiru nuu nian nune’e mós asaun ambientál iha eskola ba kamada joven liu iha populasaun nia leet.

Funsaun seluk Sekretaria Estadu ne’e nian mak halo inspesaun ba forma oinsá halo jestaun ba rezíduu restaurante, otél no ofisina sira País nian hanesan mós halo monitorizasaun ba atividade komunitária fa’an fauna protezida.

Ikus liu, fó importánsia ba partisipasaun Timor-Leste iha inisiativa rejionál sira hanesan “Coral Triangle Initiative”, programa rejionál ne’ebé mak envolve país viziñu neen atu proteze no konserva ahu-ruin iha área jeográfika.