Serimónia rekoñesimentu no desmobilizasaun ba Kombatente sira Frente Armada Rezisténsia Timor-Leste nian
Timor-Leste komemora tinan 36 loron FALINTIL ho Serimónia rekoñesimentu no desmobilizasaun ba Kombatente sira Frente Armada Rezisténsia Timor-Leste nian, ne’ebé hala’o iha loron 20 fulan Agostu 2011, iha Palásiu Governu.
Serimónia ne’e prezide hosi Prezidente Repúblika, José Ramos-Horta, ho nia programa sira mak hanesan hasa’e Bandeira Nasionál, entrega simbólika kilat gerrilla nian hosi eis-komandante FALINTIL Kay Rala Xanana Gusmão no Majór Jenerál, Taur Matan Ruak ba Prezidente Repúblika, Entrega diploma onra no medalla komemorativa nian ba antigu kombatente sira ho grau superiór,médiu no inferiór.
Antigu Kombatente sira ne’ebé ho Grau-Superiór, mak: atuál Primeiru-Ministru, Kay Rala Xanana Gusmao, Mauhuno, Majór Jenerál F-FDTL, Taur Matan Ruak, Prezidente FRETILIN Francisco Guteres, Lu’olo no Brigadeiru Jenerál F-FDTL, Lere Anan Timor.
Iha dikursu Prezidente Repúblika, José Ramos-Horta nian hateten katak. “Frente Armada ne’ebé iha tinan ruanulu resin haat nia laran hatutan ahi liberdade ita nia rai nian, sai nu’udar ahi oan ne’ebé ho segredu lakan maka’as ita nia povu nia futar fuan. Frente armada mak fó moris ba frente rezisténsia sira seluk, hanesan: Frente diplomátika ne’ebé neineik maibé konkista, hosi tinan ba tinan, apoiu no simpatia ba ita nia luta ho sira seluk iha mundu, ba nesesidade atu rona no respeita direitu ba auto determinasaun Timor oan sira nian; Frente klandestina ne’ebé habelar rezisténsia hosi foho ba knua sira, ba vila no sidade, lori halo ita nia rezisténsia sai diversifikadu liután nune’e fó presaun ba forsa okupante sira. Iha serimónia dala uluk ne’e, ita sei fó homenajen ba ema hamutuk atus rua tolunulu resin neen, feto ho mane funu nain sira ne’ebé servi iha frente Armada kleur liu sira ne’ebé servi tinan 15 to’otinan 24”
Prezidente ne’e hatutan katak, “Sira nee funu nain ne’ebé modestu, aten brani, fiar metin, ne’ebé la hanoin barak hodi ariska sira nia moris, hosi tinan ba tinan, tuba rai metin, hodi hahi nafatin mehi ukun rasik an. Hosi funu nain sira ne’e, balu militár, balu sivil, ne’ebé sai nu’udar lutun kotuk ba militár Falintil sira, ne’ebé fó tulun no fó fatin ba ita nia forsa sira. Ita nia sasin no gratidaun sei hatutan no hametin maka’as iha serimónia ne’ebé sei hala’o iha fatin seluk seluk tan, tanba ita iha funu nain veteranu asu wain ne’ebé servi povu ba libertasaun nasional iha Timor nia laran tomak. Frente Armada sira nu’udar servisu ida ne’ebé ema militár no sivil, hala’o hamutuk nu’udar maun alin. Unidade no sakrifisiu ba libertasaun povu sai mós nu’udar lisaun boot ne’ebé Falitil fó mai ita, ne’ebé sei sai mós nu’udar dalan ida ba militár foun F-FDTL. Falintil Forsa Defeza Timor-Leste sei liu hela hosi prosesu renovasaun no modernizasaun. Iha ita nia maun Taur Matan Ruak nia okos, F-FDTL hala’o hela nia transformasaun ba forsa ne’ebé modernu, profisionál ne’ebé iha kbiit atu realiza misaun foun atu bele fó mahon ba soberania ita nia pátria nian ne’ebé ita liberta ona.”
Partisipa iha serimónia komemorasaun ne’e, Prezidente Parlamentu Nasionál, Fernando Lasama de Araújo, Prezidente Tribunál Rekursu, Claudio Ximenes, Visé Primeiru-Ministru, José Luis Guteres, Prokurudora Repúblika, Ana Pessoa, Reverendisimu, Bispo Diocese Maliana no reprezentante Dioseze Díli nian, Membru Governu no Membru Parlamentu Nasionál, Ministru Defeza Indonézia no delegasaun, delegasaun hosi Angola, korpu diplomátiku no konvidadu sira seluk.
