Ministru Defeza no Seguransa simu Ministru Defeza Guiné-Bissau nian
Ministru Defeza no Seguransa,no Primeiru-Ministru, Xanana Gusmão simu iha loron dia 23 Ministru Defeza no Kombatente Liberdade ba Pátria Guiné-Bissau nian, Ocante da Silva, iha Palásiu Governu.
Sorumutu entre Ministru Defeza rua ne’e atu reforsa kooperasaun entre país rua, tanba iha posibilidade atu haklean tan relasaun iha área setoriál sira, ne’ebé sei halo análize hela atu nune’e bele iha posibilidade hodi servisu hamutuk no kontribui ba reforsu amizade nian entre povu rua.
Tuir Ocante da Silva “Timor-Leste no Guiné-Bissau mantein ona relasaun ne’ebé mak di’ak iha ámbitu bilaterál no mós Komunidade País hirak ho lian Portugés nian (KPLP), katak, maske tuir jeografia ita dook malu, maibé iha espasu ne’ebé mak ita hamutuk bele esplora no dezenvolve iha área sira importante atu halo kooperasaun entre país rua. “
Aleinde ne’e, mak tema fundamentál ba sorumutu entre líder rua ne’e, Ministru Defeza Guiné-Bissau nian hakarak reforsa Ministru Defeza no Seguransa, no Primeiru-Ministru, apoiu no solidariedade tomak iha prosesu konsolidasaun ba Pás iha Timor-Leste no promosaun ba dezenvolvimentu país nian.
