Governu Timor-Leste

Primeiru-Ministru no Ministru Defeza no Seguransa Timor-Leste, Kay Rala Xanana Gumão, akompaña hosi  Sekretáriu Estadu Defeza Julio Thomas Pinto, simu delegasaun Repúblika Indonézia ne’ebé xefia hosi Ministru Defeza Purnomo Yustiantoro no mós Ministra Komersiu Indonézia, Mari Pagestu iha Palásiu Governu, sesta-feira, loron 19 fulan Agostu.

"Atitude ida ne’ebé boot no di’ak tebes ne’ebé Republika Indonézia liu hosi nia forsa Armada hatudu jestu boot teb-tebes ba ita, hodi entrega fila fali materiál balun ne’ebé sira kaptura hosi FALINTIL, ne’e duni ita hotu tenke foti aas ezemplu boot ida ne’e ba mundu tomak, katak iha funu la rezolve buat ida. Funu hotu ona rai rua  no povu hosi Nasaun rua ne’e tenke moris hamutuk, moris ho dame no bele koopera malu ho di’ak liután. Jestu hosi ita nia maluk sira hosi Repúblika Indonézia, iha momentu ida ne’ebé iha mundu ita haree funu bara-barak oho ema rihun ba rihun, loron-loron de’it, ita husu boot ezemplu ida ne’e bele ba to’o iha fatin hotu-hotu atu hakotu funu no bele lori povu selu-seluk moris iha dame hanesan Timor-Leste ho Indonézia", hateten Primeiru-Ministru Xanana Gusmão iha konferénsia ba imprensa.

Iha fatin hanesan Ministru Defeza Indonézia, Pornomo Yustiantoro hateten, “hodi delegasaun Indonézia ne’ebé ho totál membru hitu nulu (70) hakarak fó obrigadu ba povu Timor-Leste, ba Primeiru-Ministru no mós Ministru Defeza ne’ebé simu ami ho di’ak tebes, ami nia delegasaun mós reprezenta hosi Ministra Komérsiu, Mari Pagestu no Brigadeiru TNI, Agus Suhantono hodi lori mensajen ne’ebé hato’o hosi Prezidente Repúblika Indonézia nian hodi hametin relasaun no haforsa amizade entre nasaun rua”.

Vizita Ministru Defeza Indonézia nian ho nia delegasaun sei partisipa mós iha serimónia aniversáriu FALINTIL ba tinan 36 no desmobilizasaun ba FALINTIL iha Palásiu Governu, loron 20 fulan Agostu.