Governu Timor-Leste

Tanba haree ba insidente hirak ne’ebé mosu liubá  iha Kovalima, mak Prezidente Komisaun Reguladora Arte Marsiál sira nian, Teófilo Tomás de Deus, hamutuk ho Sekretáriu Estadu Juventude no Desportu, Miguel Manatelo, ko’alia iha sesta-feira ne’e iha konferénsia ba imprensa ida kona-ba medida ne’ebé hola relasiona ho arte marsiál sira iha distritu Kovalima.

Teófilo Tomás de Deus no Miguel Manetelo hahú hodi lamenta ba lalaok hirak ne’ebé mosu iha Kovalima, hodi hatudu sira nia solidariedade no apoiu ba vítima no sira nia familiár sira.

Sira refere mós katak, Komisaun Reguladora Arte Marsiál sira nian (KRAM) no Sekretaria Estadu Juventude no Desportu (SEJD) sei foti medida legál hotu, tuir sira nia kompeténsia, hodi evita atu insidente hirak hanesan ne’e labele mosu tan no atu hodi proteje dignidade, lejitimidade no interese husi prátika arte marsiál nian iha Timor-Leste.

Nune’e, sira deside halo suspensaun preventiva ba atividade hotu-hotu ne’ebé relasiona ho arte marsiál sira iha distritu Kovalima, inklui mós utiliza atributu hirak ne’ebé relasiona ho arte marsiál sira, no hahú ho prosesu disiplinár ida hodi investiga faktu sira, identifika responsável sira no aplika sansaun. Aleinde prosesu disiplinár husi KRAM, autoridade kompetente sira sei hala’o instaurasaun prosesu kriminál nian hasoru alegadu infraktór sira.

KRAM sei atua liu hosi koordenasaun  ho SEJD, Sekretaria Estadu Defeza no Sekretaria Estadu Seguransa Nasionál, Polísia Nasionál Timor-Leste no Forsa Armada Timor-Leste nian hodi asegura kumprimentu ba desizaun.