SEFOPE Asina Nota Entendimentu ho Sentru Formasaun Komunidade nian
Sekretaria Estadu Profisionál no Empregu (SEFOPE), iha fulan Agostu tinan ne’e, asina nota entendimentu ho sentru formasaun komunidade hanesan sentru formasaun Dom-Bosco Komoro no Konfederasaun Sindikatu Timor-Leste (KSTL).
Objetivu asina nota entendimentu ne’e, hanesan kompromisu SEFOPE nian atu kontinua nafatin fó apoiu ba sentru formasaun ne’ebé komunidade sira harii atu kolabora hamutuk ho SEFOPE hodi hasa’e kapasitasaun no hadi’a abilidade rekursu umanu nian, liuliu iha área téknika profisionál, informa Sekretáriu Estadu Formasasun Profisionál no Empregu, Bendito Freitas
Sekretáriu Estadu ne’e mós hateten tan katak, atu hasa’e kapasitasaun ba rekursu umanu la’ós responsável Governu nian mesak, maibé kontribuisaun hosi sentru formasaun komunidade sira nian mós importante, atu jere didi’ak fundu ne’ebé mak SEFOPE aloka ba, tuir sira-nian nesesidade no ezijénsia, no mós bele fó korajen ba formandu sira hodi halo kompetisaun iha merkadu indústria, tenik Bendito Freitas.
Iha fatin hanesan SEFOPE mós asina nota entendimentu ho instituisaun Governu nian hanesan, Ministériu Justisa (MJ), Ministériu Administrasaun Estatal no Ordenamentu Territóriu (MAEOT) no Ministériu Edukasaun ho objetivu atu fasilita no fó formasaun iha fatin servisu nian, ba juventude sira hamutuk 369 hodi buka esperiénsia servisu, molok sira atu tama iha vida servisu profisionál.
