Membru Sub-Komisaun Reguladora Arte-Marsiál Baukau nian simu posse
Komisaun Reguladora Arte-Marsiál (KRAM) ne’ebé estabelese ho Lei n.°10/2008, loron 16 fulan Jullu, loke tan no sub-komisaun iha distritu Baukau liu hosi tomada posse ne’ebé fó hosi Miguel Manetelo ba membru sub-KRAM nain lima (5), inklui Pr. Parókia Baukau, Justiniano de Souza nu’udar prezidente, iha distritu Baukau sesta loron 5 fulan Agustu 2011.
Entretantu membru nain haat, seluk mak hanesan Sergio Gusmão Belo, Prezidente FESTIL distritu Baukau nu’udar Vise, Justino Monteiro hosi Ministériu da Justisa, Rui Manuel Belo hosi Ministériu Edukasaun no Virgilio Pereira hosi Organizasaun Kunfu Master.
Kna’ar membru Sub-KRAM hirak ne’e, tuir Prezidente Komisaun Reguladora Arte-Marsiál sira, Firminio Dias Quintas mak hanesan diskute kona-ba kestaun ne’ebé iha relasaun ho hanorin, aprende no hala’o arte-marsiál, nomós fó pareser ka hanoin kona-ba pedidu autorizasaun atu harii sentru, klube, ka eskola sira ne’ebé atu hala’o arte-marsiál sira nomós ratifika eleisaun ba responsável atu fiskaliza atividade no modalidade seluk ne’ebé relevante.
Iha biban ne’e Manetelu mós hatete katak atu halo promosaun, hanorin no aprende arte sira tenke halo tuir lei enkuadramentu jurídiku nomós regulamentu espesífiku atu nune’e bele garante orden iha públiku no respeitu sidadaun sira nia direitu, liberdade no konfiansa.
Hola parte iha serimónia ne’e mak Administrador distritu Baukau, António A. Guterres ne’ebé hatete katak ho tomada posse ne’e estabelesimentu Sub-KRAM iha distritu Baukau bele define no regula prátika arte-marsiál sira ne’ebé moris iha Timor-Leste nia laran liliu iha Distritu Baukau. Arte-marsiál sira ne’ebé oras ne’e daudaun hetan ona legalidade hosi Ministériu Justisa mak, Kera-Sakti, Korka, Kempo, Perisai Diri.
