Komisaun Funsaun Públika fó pose ba funsionáriu 2935
Komisaun Funsaun Públika iha loron 20 to’o 22 fulan Jullu 2011 fó Pose ba funsionáriu kontratadu ba Permanente iha Distritu, Lauten, Vikeke, Baucau no Manatutu hamutuk ema nain 2935.
Prezidente Funsaun Públika iha nia diskursu hateten katak, “haksolok tebe-tebes tanba Komisaun Funsaun Públika ho estrutura Ministériu hotu bele marka prezensa iha Distritu Lauten, Vikeke, Baucau no Manatutu hodi fó pose ba funsionáriu temporáriu sira hodi enkuadra iha kuadru permanente nian, hafoin iha loron 1 fulan Jullu tinan 2011, hala’o uluk ona iha distritu Dili, ho totál funsionáriu sira rihun neen”, hateten Eng. Libório Pereira.
Nia mós hatutan tan katak, ita nia prosesu konversaun hala’o tanba bazeia ba polítika Governu nian, liu hosi Rezolusaun n.° 42/2010, loron 17 fulan Novembru inisiativa ida ne’e mai tanba komisaun funsaun públika halo estudu ba ita nia administrasaun Públika, Tanba ne’e, ohin ita boot sira simu ona pose nu’udar funsionáriu públiku. Tuir Lei n.° 5/2009 loron 15 fulan Jullu, altera estatutu Funsaun Publika, regula ona regra no ita nia devér sira ho ita nia direitu, tanba funsionáriu barak mak koloka iha territóriu tomak, maibé funsionáriu sira ne’e servisu ho responsabilidade, dedikasaun, nasionalismu katak sira serví ba Estadu, servisu ho patriotizmu. Esplika Libório Pereira.
Iha biban ne’e Administradór Distritu Lautem, Jeferino Pereira, fó agradese ba Governu no mós ba Prezidente Komisaun Funsaun Públika, tanba loron ohin hanesan loron istóriku ba funsionáriu atus ne’en haatnulu resin lima, bele sai ona funsionáriu Permanente.
Administradór Distritu Vikeke, Francisco Guterres, husu ba Funsionáriu sira ne’ebé foin simu knaar foun hanesan funsionáriu permanente tenke kumpri imi nia juramentu, katak obdese ba Estadu no Governu, tenke kumpri duni, la’ós ho ibun de’it maibé tenke tau iha prátika saida mak ita boot sira hateten iha Juramentu ne’e”.
Administradór Distritu Baukau, Antonio Guterres , “Ohin loron Governu fiar ba ita liu-liu ba funsionáriu kontratadu ne’ebé muda nia estatutu ba permanente katak, ita bot sira sei servisu tinan ba tinan ejiji no ko’alia ba ita boot nia diresaun bainhira iha buat ruma mak lao la di’ak. Maibé hau husu buat ida de’it ba ita hotu sira ne’ebé hanesan servidór Estadu, mákina estadu nian, tenke define ita nia pozisaun loloos katak hau duni mak mákina estadu nian, hau sei la halo avaria mákina ne’e, maibé sei haforsa ami nia kompromisu hodi serve povu no estadu ida ne’e”.
Administradór Distritu Manatutu, Elvino Bonaparte do Rego hateten katak, kontente tebe-tebes tanba ohin loron hasoru malu kuaze farda nia koor hanesan uituan de’it. Atu dehan de’it katak, ohin iha juramentu ne’e buat barak ita boot sira ko’alia no promote iha ne’ebá, mai ita hamutuk hametin liután ita nia Estadu ne’e ohin, nune’e dezenvolvimentu bele la’o di’ak, tanba kompromisu dehan tiha ona, la fihir ba ema ida, kaer de’it ba prinsipiu ne’ebé iha Lei, ita tenta halo tuir buat ida ne’e, tanba ita funsionáriu mak mákina estadu nian, hateten Administradór iha ninia intervensaun.
Funsionáriu emposadu sira iha distritu haat ne’e hamutuk ema nain, 2935, ho totál tuir distritu idai-dak, Distritu Lauten, emposadu hamutuk 645, ne’ebé serimónia fó pose hala’o iha loron 20 fulan Jullu 2011, Distritu Vikeke, 759, loron serimónia fó pose nian iha 21 fulan Jullu 2011, Distritu Baukau, emposadu hamutuk 1085 no Manatutu, emposadu hamutuk 446, ne’ebé loron serimónia fó pose hala’o iha loron 22 fulan Jullu 2011.
Partisipa iha tomada pose ba funsionáriu sira iha Distritu haat ne’e, mak hanesan, Presidente Funsaun Públika, Eng. Libório Pereira, MIM, Komisária Isabel da Costa Fereira, Komisáriu Abél Ximenes, Diretór Jerál hosi Ministériu no Sekretária Estadu sira hotu no Administradór Distritu sira.
