Ministériu Agrikultura no Peska hala’o kolleta ba hare íbrida iha distritu Manututu
Primeiru-Ministru, Kay Rala Xanana Gusmão, akompaña hosi Ministru Agrikultura no Peska, Mariano Asanami Sabino no Embaixadór Xina iha Timor-leste, iha loron 15 fulan Jullu, hala’o kolleta hare íbrida hamutuk hektare 25, iha Distritu Manatutu, ne’ebé hetan apoiu husi Governu Xina.
Primeiru-Ministru, fó agradese tebes ba apoiu hosi Governu Xina, tanba “ko’alia kona-ba dezenvolvimentu Timor-Leste nian agora daudaun konsentra mós ba iha área agrikultura, área ne’e importante tebes. Tanba ita haree ba seguransa alimentár iha mundu sai problema boot tebe-tebes, ne’e duni ita rasik mak tenke garante atu asegura produsaun ba ita nia an rasik”, tenik Xanana Gusmão.
Ministru Agrikultura no Peska, Mariano Assanami Sabino esklarese, “hosi parte MAP agradese ba Governu Xina tanba fó apoiu ona agrikultura Distritu Manatutu hodi kuda hare sistema íbridu, aleinde Ministériu mós haruka ema na’in- 31 husi timór-laran tomak ba treina iha área agrikultura nian kona-ba hare íbrida iha nasaun Xina, ne’e duni ba futuru oinsá mak ita kria fini íbrida iha ita- nia rain rasik”
Diretór Diresaun Servisu Agrikultura Distritu Manatutu, Deolindo de Oliveirra, hateten, iha tinan ida ne’e Distritu Mananutu halo kolleta hare ektare 200, ne’e hanesan rezultadu di’ak liu hosi kooperasaun entre Governu Xina ho Timor-Leste hodi apoiu povu nia agrikultura.
