MED fó ajuda karau vaka 50 ba Grupu Kooperativa
Ministru Ekonomia no Dezenvolvimentu (MED), João Mendes Gonçalves, iha loron 2 fulan Jullu fó ajuda karau vaka hamutuk 50 ba Grupu Kooperativa Kréditu Uniaun Timor Maffo (KKUTM), iha Aldeia Pune, Suku Usi Tasae, Sub-Distrito Oesilo, Distrito Oe-cusse.
Governu iha kompromisu atu tulun grupu kooperativa sira ne’ebé harii iha Timor-Leste, tan ne’e mak Governu entrega karau vaka sira ne’e ba Kooperativa Kréditu Uniaun Timor Maffo, atu sai hanesan prioridade ida ba grupu ne’e hodi hala’o sira nia atividade ekonómika atu nune’e bele hetan rendimentu ba moris lorloron hosi membru sira grupu ne’e ninian”. Heteten Ministru Ekonómia no Dezenvolvimentu (MED), João Mendes Gonçalves.
Iha fatin hanesan Prezidente KKUTM, Jorge Paixão, agradese ba tulun ne’ebé Governu fó no husu atu Ministériu Ekonomia no Dezenvolvimentu liu hosi Diresaun Nasionál Dezenvolvimentu Rurál, atu fó nafatin atensaun ba grupu ne’e atu bele dezenvolve di’ak liután iha futuru. Nia hatutan tan katak, objetivu hosi harii grupu kooperativa ne'e, atu eduka populasaun no família sira kona-ba oinsá atu halo poupansa ba osan, ho nune’e bele hamenus kiak iha Suku Usi Tasae.
