Governu Timor-Leste organiza Sorumutu Bilaterál ho Parseiru Dezenvolvimentu
Governu Timor-Leste organiza sorumutu bilaterál ho parseiru dezenvolvimentu sira iha segunda-feira, loron 11 fulan Jullu 2011, iha salaun VIP Ministériu Negósiu Estranjeiru iha Dili.
Sorumutu ne’e prezide hosi Vise-Primeiru-Ministru, José Luís Guterres akompaña hosi Ministru Negósiu Estranjeiru, Zacarias Albano da Costa no Vise Ministru Finansa, Rui Manuel Hanjam.
“Hanesan ita hotu hatene parseiru dezenvolvimentu sira nia ajuda mai Timor-Leste barak tebe-tebes iha área Saúde, Edukasaun, Seguransa, Infraestrutura, Agrikultura, Justisa, sosiál no seluseluk tan. Ne’e duni iha sorumutu ida ohin, sira iha kompromisu boot atu kontinua nafatin fó ajuda mai Timor-Leste iha futuru, liu-liu iha projetu dezenvolvimentu rurál nian” hateten Vise-Primeiru-Ministru, José Luís Guterres.
Iha fatin hanesan Ministru Negósiu Estranjeiru, Zacarias Albano da Costa hateten katak “objetivu hosi sorumutu bilaterál ne ‘e atu halo avaliasaun fali ba implementasaun projetu sira ne’ebé mak doadór sira fó no atu identifika mós área foun ne’ebé mak sira atu fó apoiu iha tempu oin mai”.
Parseiru Dezenvolvimentu sira ne’ebe mak partispa iha sorumutu ne’e, hanesan, Japaun, Estadus Unidus Amérika, Méxiku, Portugál, Brazíl, Uniaun Europeia, Singapura, Korea, Austrália, Nova Zelandia, Banku Dezenvolvimentu Aziatíku no Banku Mundiál.
