Governu Timor-Leste

Ministra Finansa Emília Pires, realiza konferénsia imprensa ida ba Orgaizasaun Sosiedade Sivíl kona-ba Sorumutu Perseiru Dezenvolvimentu Timor-Leste (SPTDL) nian. Konferénsia Imprensa ne’e hala’o iha loron 05 fulan Jullu tinan 2011, iha Sentru Koñesimentu Ministériu Finansa nian, no konta ho prezensa reprezentante organizasaun sosiedade sivíl lokál no internasionál nian, hodi hatudu kolaborasaun ne’ebé mak’as entre Governu no Sosiedade Sivíl hodi harii Nasaun.

Emília Pires Esplika katak SPDTL tuir mai ne’ebé mak atu hala’o husi loron 11 no loron 13 fulan Jullu,  sei hatudu mudansa espesífika, sei iha mós lansamentu ba Planu Estratéjiku Dezenvolvimentu (PED) husi Primeiru-Ministru Xanana Gusmão, iha loron 12 fulan Jullu,  no sei iha meza kabuar lima ne’ebé mak sei deskute kona-ba área hirak ne’ebé ho tema tuir mai:1) mina rai;2) finansa, banka ho investimentu sira;3) agrikultura no dezenvolvimentu rurál;4) infra-estrutura no 5) kapitál sosiál.

Ministra Finansa dehan tan katak SPDTL tenke hatán ba kestaun hirak hanesan: saida mak atu hala’o atu tulun Governu hodi jere ema nia moris di’ak; oinsá atu armoniza no integra asisténsia hosi liur hodi fó apoiu ba prosesu dezenvolvimentu Timor-Leste nian; mekanizmu saida mak atu aplika hodi bele jere ho efekás programa hirak dezenvolvimentu nian; kompromísu saida de’it mak parseiru Dezenvolvimwentu sira no Governu tenke iha hodi asegura programa hirak kona-ba dezenvolvimentu atu bele jere di’ak liután, no oinsá atu aumenta kapasidade produsaun rai-laran nian atu nune’e bele hamenus importasaun.

Iha konferénsia ne’e fó hatene mós ba organizasaun sosiedade sivíl nian sira katak Timor-Leste oras ne’e sai hela mata dalan ba diálogu internasionál hahú kedas husi fulan Abríl 2010, inklui eventu hirak foin daudaun hala’o iha Monróvia g7+ no diálogu internasionál ( ne’ebé hala’o iha loron 12-14 Juñu no loron 15-16 Juñu 2011) ne’ebé mak hetan susesu, iha Monróvia Road Map ne’ebé mak sei hato’o iha Busan koreia súl iha forum altu nível, ne’ebé sei hala’o iha fulan Dezembru tinan 2011.

Ministra Finansa mós dehan katak Timor Nia mehi atu iha futuru bele sai nu’udar milagre ida aziátiku hanesan Singapura, Honkong, Xina no Koreia. Atu to’o iha ne’ebá medida fundamentál oin-oin mak presiza atu hetan susesu: liu-liu muda mentalidade hamutuk ho formasaun no lei sira.

Durante konferénsia ne’e reprezentante sira hosi organizasaun sosiedade sivíl hato’o pergunta oin-oin, tan ne’e ministra fó sujestaun atu sira bele organiza-an no bele hola parte iha diskusaun hirak meza kabuar nian iha sorumutu perseiru dezenvolvimentu Timor -Leste nian.