Sekretáriu Estadu Bendito Freitas Asina Nota Entendimentu ho Parseiru Lokál
Sekretáriu Estadu ba Formasaun Profisionál no Empregu (SEFOPE), Bendito Freitas, iha loron 17 fulan Juñu tinan ne’e, iha salaun SEFOPE Kaikoli, Díli, asina nota entendimentu ho parseiru lokál sira hanesan Sentru Formasaun hamutuk 13, hodi fó apoiu orsamentu dolár 199,456.00 ba juventude hamutuk ema na’in 690.
“Objetivu asina nota entendimentu ne’e, atu bele akomoda juventude sira, hodi aprende no fó fatin ba juventude sira, bele hetan esperiénsia servisu nian no atu hasa’e kapasidade rekursu umanu joven sira nian”, tenik Sekretáriu Estadu Formasaun Profisionál no Empregu, Bendito Freitas.
Sekretáriu Estadu Benditu Freitas mós husu ba Sentru Formasaun sira ne’ebé asina nota entendimentu ho SEFOPE, atu fó garantia ida ba juventude sira hodi hetan servisu, bainhira remata sira-nia formasaun. Aleinde ne’e, husu mós ba Sentru Formasaun ne’ebé fó formasaun iha área Ospitalidade, tenke fó ho másimu, tanba área Ospitalidade sai hanesan poténsia boot iha futuru.
Sentru Formasaun 13 ne’e mak hanesan, Sentru Treinamentu Vizaun Foinsa’e Timor-leste, Sentru da Paz st. Isabel Manatutu, Sentru Treinamentu Vokasionál Juventude (NRC) Camea, Sentru Treinamentu Vokasionál Juventude (NRC) Ermera, Gleno, Sentru Treinamentu Vokasionál Juventude (NRC) Bairopite, Sentru Treinamentu Vokasionál Juventude (NRC) Komoro, Sentru Treinamentu Vokasionál Juventude (NRC) Manatutu, Sentru Formasaun Informátika no Kustura Madalena Moranu Fuiloro, Senai Bekora, Citra Mandiri Gleno, Sentru Treinamentu Claret (CTC Salele), CNEFP Tibar, no Sentru kreativu Komunidade.
