Sekretáriu Estadu Peskas Aborda Peska Sustentável no Ekonomia Azul iha Programa “Página do Governo”
Sekretáriu Estadu Peskas, Domingos da Conceição dos Santos, sei sai bainaka iha programa “Página do Governo”, ne’ebé sei transmite iha sexta-feira, loron 16 fulan-outubru tinan 2026, tuku 7 kalan, iha RTTL no mídia sosiál sira. Epizódiu da-29 ne’e sei aborda prioridade Governu nian ba peska sustentável, seguransa alimentár no diversifikasaun ekonomia.
Durante entrevista, Sekretáriu Estadu destaka potensiál setór peskas nian atu kria oportunidade servisu, apoia komunidade iha zona kosteira no hamenus dependénsia Timor-Leste nian ba reseita petróleu. Nia esplika planu atu hametin infraestrutura peskas, dezenvolve akuikultura no hadi’a asesu ba merkadu nasionál no internasionál.
Konservasaun rekursu marinu no kombate ba peska ilegál mós sai tema prinsipál iha entrevista. Diskusaun aborda koordenasaun liuhosi Autoridade Marítima Nasionál, nesesidade ekipamentu di’ak liután ba fiskalizasaun, no partisipasaun komunidade nian iha protesaun rekursu marinu liuhosi prátika peska sustentável no tara bandu.
Epizódiu ne’e mós aborda planu ba investigasaun mariña no reforma sistema lisensiamentu, nune’e mós dezafiu ne’ebé peskadór no produtór akuikultura sira enfrenta, inklui infraestrutura limitadu no kustu aas ba hahán ikan.
Governu konvida populasaun tomak atu akompaña edisaun “Página do Governo” ida-ne’e, iha sesta-feira, loron 16 fulan-outubru tinan 2026, oras tuku 7 kalan, iha RTTL no mídia sosiál sira.
Programa "Página do Governo" hanesan inisiativa ida hosi Gabinete Portavós Governu nian, ne'ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL no mídia nasionál sira.
Programa ne’e nia objetivu atu reforsa transparénsia governativa no garante sidadaun sira-nia asesu ba asaun no desizaun prinsipál sira Ezekutivu nian. Programa ne'e konta ho Nélia Chaves nu'udar aprezentadora no Ika Moniz nu'udar produtora ezekutiva. Apoiu tékniku fornese hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne'ebé hetan entrevista.
