Governu Timor-Leste

Delegasaun ida husi Asosiasaun Traballadór Funsaun Públika Makau nian (ATFPM), ne’ebé lidera hosi Prezidente Asembleia Jerál, Rita Santos, no Prezidente Diresaun no Deputadu Asembleia Lejizlativa Makau nian, José Pereira Coutinho, hala’o vizita institusionál ida ba Timor-Leste iha semana kotuk, ne’ebé sira hala’o sorumutu ho membrus Governu no reprezentantes husi órgaun soberanu sira. 

Vizita ne’e organiza husi Gabinete Vise-Primeiru Ministru, Francisco Kalbuadi Lay, ho apoiu husi Delegadu Timor-Leste nian iha Sekretariadu Permanente Forun Makau, António Ramos da Silva, no konta ho patrosíniu Fundasaun Makau nian. Durante viajen ne’e, hala’o kontaktu institusionál sira no ko’alia kona-ba oportunidade kooperasaun sira entre Timor-Leste no Makau, liuliu iha área formasaun rekursus umanus, Administrasaun Públika, edukasaun, investimentu, no dezenvolvimentu ekonómiku.

Iha loron 8 fulan-outubru, delegasaun ne’e hasoru malu ho Vise-Ministru ba Fortalesimentu Institusionál, Paulo Manuel da S. dos Remédios. Sorumutu ne’e foka ba modernizasaun sistema jurídiku, halo revizaun ba kódigu legál prinsipál sira, simplifikasaun ba  prosedimentu administrativu no hadi’a kualidade servisu públiku sira.

Delegasaun ne’e mós hasoru malu ho Ministru Planeamentu no Investimentu Estratéjiku, Gastão Francisco de Sousa, ne’ebé aprezenta projetu infraestrutura prinsipál sira no mós prioridade sira iha ámbitu planeamentu estratéjiku no investimentu nian. Sorumutu ne’e mós ko’alia kona-ba posibilidade partisipasaun husi investidór sira husi Xina no Makau iha dezenvolvimentu ekonómiku Timor-Leste nian.

Iha loron 7 fulan-outubru, Rita Santos no José Pereira Coutinho simu husi Prezidente Parlamentu Nasionál, Maria Fernanda Lay. Sorumutu ne’e ko’alia kona-ba lasu amizade sira no kooperasaun entre Timor-Leste no Makau no mós apoiu ne’ebé fornese durante tinan barak nia laran ba komunidade timoroan ne’ebé hela iha Rejiaun Administrativa Espesiál Xina nian.

Iha loron 9 fulan-outubru, reprezentante sira husi ATFPM simu husi Prezidente Repúblika, José Ramos-Horta, iha Palásiu Prezidensiál Nicolau Lobato. Durante audiénsia ne’e, ko’alia kona-ba área kooperasaun sira  hanesan formasaun rekursus umanus, edukasaun, funsaun públika, komérsiu no investimentu, iha kontestu relasaun istórika entre Timor-Leste no Makau.

José Pereira Coutinho destaka esperiénsia Makau nian iha formasaun kuadru timoroan sira, ne’ebé inklui profisionál sira husi  area Direitu ne’ebé hala’o estudu universitáriu iha territóriu ne’ebá no agora daudaun  hala’o knaar  iha Timor-Leste.

Rita Santos destaka Makau nia papél  nu’udar  plataforma ligasaun entre Xina no país lian portugeza  sira, iha ámbitu Forun ba Kooperasaun Ekonómika no Komersiál entre Xina ho País  Lian Portugeza sira (Forun Makau), no mós posibilidade sira atu reforsa kontaktu ekonómiku no institusionál.

Programa viajen ne’e inklui mós vizita ba Arkivu & Muzeu Rezisténsia Timorense no mós Eskola Portugeza Dili – Sentru  Ensinu no Língua Portugeza Ruy Cinatti.