Governu Timor-Leste

Tuir programa reforma Ministériu Finansa nian, liu-liu Programa Dezenvolvimentu Profisionál (PDP), Vise Ministru Finansa nian, Rui Manuel Hanjam, ne’ebé prezidi serimónia despedida iha loron 27 fulan Juñu 2011, ba  bolseiru na’in sia ne’ebé mak atu bá iha Sekolah Tinggi Ilmu Statístika,iha Jakarta Indonézia, hodi frekuenta kursu universitáriu Estatístika nian.

Ne’e hanesan grupu badala rua bolseiru nian ne’ebé selesiona ona husi kandidatu 133, ne’ebé sira nain 66 tuir prosesu ezame ne’ebé rigorozu tebes, bazea ba méritu. Teste sira ne’e hetan supervizaun husi profesór sira ne’ebé ho kualidade aas tebes mai husi Sekolah Tinggi Ilmu Statistika , ne’ebé mak tuir modalidade hanesan ho modalidade ne’ebé mak aplika ba iha primeiru grupu bolseiru nian, iha fulan Setembru tinan 2010.

Prosesu administrativu ba selesaun hala’o tiha ona husi Seksaun ba PDP Diresaun Jerál Servisu Korporativu Ministériu Finansa nian.

Vise Ministru Rui Hanjam, iha nia diskursu, rekomenda ba bolseiru sira atu hala’o servisu ho dedikasaun, nu’udar individu e mós nu’udar grupu, no labele hakiduk hasoru difikuldade sira; no mantein disiplina, maske hetan ona susesu di’ak; respeita nafatin kultura lokál. Vise Ministru afirma katak bolseiru sira mai kumpri iha tempu naruk, hanesan parte ba programa kapasitasaun rekursu umanu país nian no sira ne’ebé mak iha kapasidade hodi prenxe falla sira iha tempu oin mai.

Reprezentante husi estudante hirak ne’e agradese Ministériu Finansa ba oportunidade ida boot ne’ebé reprezenta bolsa estudu ne’e no promete sei servisu to’o kumpri mehi hodi simu sertifikadu graduasaun nian, ne’ebé mak hein katak bele hetan valór ruma ba Ministériu no ba prosesu dezenvolvimentu Timor-Leste nian, iha tempu oin mai.