SEFTEK entrega sertifikadu dahuluk sira
Sentru Formasaun Téknika Komunikasaun (SEFTEK), Sekretaria Estadu Konsellu Ministru (SEKM) nian, halo hotu ona kursu dahuluk kona-ba komunikasaun – hakerek imprensa – ho entrega sertifikadu durante almosu ida, iha loron 17 fulan Juñu, iha Restaurante ida iha Dili. Aleinde formandu na’in sanulu resin lima ne’ebé halo hotu ona módulu ne’e ho susesu, iha eventu ne’e partisipa mós formadór no responsável sira SEFTEK nian, Sekretáriu Estadu Konsellu Ministru, Sekretáriu Estadu ba Formasaun Profisionál no Empregu, no Prezidente Komisaun Funsaun Públika nian ne’ebé halo entrega ofisiál sertifikadu sira.
Kursu Komunikasaun ho ninia módulu formasaun nian ida-idak – hakerek imprensa (uluk liu ne’ebé remata iha fulan Juñu ne’e, Téknika Rádiu nian, Téknika Televizaun nian, Informátika no Multimédia – sertifika husi Asosiasaun Nasionál Akrediatsaun Ensinu, ho Sertifikadu Nasionál Estudu kona-ba Komunikasaun Sosiál Nivel III no Nivel IV.
Sertifikadu Nasionál sira Estudu Meiu Komunikasaun Sosiál – Nivel IV – iha garantia kualidade ensinu nian, liu husi mekanizmu sira ne’ebé Governu Konstitusionál IV dezenvolve. Prosesu Akreditasaun Ensinu SEFTEK nian, la’o hela, iha parseria entre INDMO (Instituto Nacional de Desenvolvimento de Mão-de-Obra), institutu autónomu husi kompeténsia Sekretaria Estadu Formasaun Profisionál no Empregu, no Sekretaria Estadu Konsellu Ministru (SEKM).
SEFTEK mosu husi reestruturasaun husi antigu Sentru Formasaun iha Relasaun Públika Governu nian (SFRPG), ne’ebé hahú ninia atividade iha tinan 2004, iha parseria hamutuk entre Governu no organizasaun internasiolnál oioin. Ho reestruturasaun ne’ebé halo iha tinan ida ne’e, Sentru Formasaun nian ba fali iha tutela direta husi SEKM, no iha knaar atu promove atividade formasaun nian sira ba profisonál komunikasaun sira Funsaun Públika nian.
Objetivu prinsipál SEFTEK nian mak kontribui ba melloria komunikasaun nian – la’ós de’it entre ministériu sira maibé mós entre Governu ho sosiedade sivíl. Iha mós hakarak atu hetan kualidade no efikásia ne’ebé boot liu husi informasaun ne’ebé habelar iha meiu komunikasaun nian sira iha ámbitu nasionál, rejionál no lokál. Ba ida ne’e, dezenvolve aperfeisoamentu no kualifikasaun husi Profisionál Komunikasaun nian sira Funsaun Públika nian hodi fó ba sira ferramenta téknika ne’ebé atuál, husi área komunikasaun nian.
Atividade formasaun sentru ne’e nian hatuur iha Kursu Komunikasaun nian ida ne’ebé envolve módulu formasaun no semináriu ho karáter teóriku no prátiku. Sekretaria Estadu Konsellu Ministru hakarak fó, liu husi SEFTEK, ensinu ida ne’ebé kle’an iha komunikasaun bazeia ba informasaun no teknolojia foun sira, hodi uza metodolojia On the Job Training (formasaun prátika), ba Tékniku Komunikasaun sira Funsaun Públika nian.
SEFTEK
Kursu formasaun dezenvolvidu husi Sentru Formasaun nakloke ba profisionál sira hotu komunikasaun Funsaun Públika nian ne’ebé hakarak aumenta sira nia koñesimentu iha área ida ne’e.
Módulu formasaun dezenvolve tuir períodu no reflete kona-ba kestaun prátika traballu profisionál sira komunikasaun nian. Iha módulu imprensa, formandu sira hetan koñesimentu kona-ba redasaun komunikadu imprensa; iha rádiu, aprende halo edisaun no produsaun ba rádiu; iha televizaun hanorin kona-ba téknika edisaun no produsaun programa televizaun nian; no iha informátika, iha nível rua-introdusaun ba informátika no formasaun avansada, ho baze iha programa Windows no Office; hanesan mós iha multimédia nian.
SEFTEK prevee tiha ona realizasaun semináriu no workshop sira kona-ba produsaun no organizasaun ba eventu, protokolu, asesoria imajen, porta-vóz no relatóriu/publikasaun sira.
Atu dezenvolve sira nia asaun formasaun, SEFTEK uza bolsa ida ba formadór sira kompostu husi profisionál nasionál no internasionál sira, husi área komunikasaun oin-oin, mak hanesan profesór universitáriu sira, jornalista no tékniku husi área oin-oin ne’ebé iha kurríkulu no esperiénsia relevante, atu bele garante nível formasaun hirak ne’e. Kapasidade téknika ba formadór sira liu husi realizasaun semináriu formasaun pedagójika, hodi hetan nia sertifikasaun tuir lejislasaun ne’ebé mak vigora hela.
Hetan susesu iha formasaun ne’e tanba liu husi servisu hamutuk entre formadór no tradutór sira. Katak, atu garante komprensaun ba formandu sira, bainhira presiza, kursu hirak ne’e, hala’o iha lian rua, ho tradusaun simultánea iha lian portugés ka lian inglés ba lian tetun. Metodolojia ida ne’e, hanesan aprendizájen ida ne’ebé di’ak liu hodi aprende lian ofisiál sira.
Nune’e, Sekretaria Estadu Konsellu Ministrus, uza rekursu hirak ne’eb’e mak eziste iha ninia departamentu rua – SEFTEK no Diresaun Nasionál Tradusaun – sobu obstákulu lian nian no reforsa troka koñesimentu entre dimensaun kulturál oin-oin.
