Governu Timor-Leste

Iha loron 29 no 30 fulan-setembru tinan 2026 Vise-Ministra ba Asuntus ASEAN, Milena Rangel, partisipa iha Australia–ASEAN Business Forum 2026, ne'ebé hala’o iha Adelaide Convention Center, iha Adelaide, Austrália Súl. Vise-Ministra partisipa sai hanesan oradora prinsipál ida no fahe perspetiva kona-ba tema “Investe iha ASEAN: Oportunidade ba tinan oinmai”, iha enkontru ne’ebé halibur reprezentantes governu no empreza sira husi Austrália no rejiaun ASEAN.

Forun ne’e halibur reprezentantes governu, dirijente emprezariál sira no parseiru sira seluk hosi Austrália no Estadus-Membrus ASEAN nian, ho objetivu atu promove relasaun ekonómika, identifika oportunidade komérsiu no investimentu, no mós dezenvolve parseria entre rejiaun rua ne’e.

Edisaun 2026 nian hala'o ho tema "Hakle’an integrasaun ekonómika entre Austrália ho ASEAN iha situasaun globál ida ne'ebé iha nafatin mudansa" no foka liu ba diskusaun sira iha área hanesan komérsiu no investimentu, seguransa no tranzisaun enerjétika, ekonomia dijitál, intelijénsia artifisiál no inovasaun, seguransa alimentár no agronegósiu, kapitál umanu no dezenvolvimentu forsa traballu, no mós integrasaun ekonómika entre Austrália no ASEAN.

Vise-Ministra Milena Rangel halo parte hosi grupu oradór prinsipál sira iha Forun ne’e, hamutuk ho Sekretáriu-Jerál ASEAN, Kao Kim Hourn, reprezentantes governu Austrália nian no reprezentantes hosi Estadus-Membrus ASEAN, no mós dirijente sira hosi setór emprezariál.

Iha sesaun abertura, Sekretáriu-Jerál ASEAN destaka reforsu kooperasaun entre ASEAN no Austrália iha área komérsiu no investimentu, reziliénsia hosi kadeia fornesimentu, tranzisaun enerjétika, transformasaun dijitál, dezenvolvimentu kompeténsia, no mós partisipasaun setór privadu nian.

Australia–ASEAN Business Forum nu’udar plataforma diálogu ida entre setór públiku no privadu ne’ebé ho objetivu atu promove kontaktu, komérsiu, investimentu no relasaun emprezariál entre Austrália no nasaun sira ASEAN nian. Edisaun tinan ida-ne'e nian buka atu identifika oportunidade sira hodi hasa’e kolaborasaun ekonómika no dezenvolve parserias ba tempu naruk.