Sekretáriu Estadu Dezenvolvimentu Lokál aborda desentralizasaun iha programa “Página do Governo”
Sekretáriu Estadu Dezenvolvimentu Lokál, Mateus dos Santos Tallo, sai bainaka iha programa “Página do Governo”, hodi aprezenta prioridade no inisiativa sira atu hametin administrasaun lokál no preparasaun munisípiu sira ba desentralizasaun no poder lokál.
Durante entrevista, nia destaka importánsia Planu Dezenvolvimentu Munisipál no Komunitáriu, partisipasaun komunidade iha definisaun prioridade sira, no kapasitasaun autoridade lokál sira, liuhosi kolaborasaun ho Institutu Nasionál tuteladus.
Membru Governu ne’e aborda mós dezafiu sira kona-ba rekursu umanu, orsamentu no infraestrutura, no apela ba koordenasaun ne’ebé forte liu entre autoridade munisipál no lideransa komunitária sira hodi hadi’a servisu ba populasaun.
Governu konvida telespetadór sira hotu atu akompaña entrevista ne’e iha programa “Página do Governo”, hodi hetan informasaun detallada kona-ba servisu Governu nian no prioridade ba dezenvolvimentu lokál. Keta haluha, edisaun da-28 nian, sesta-feira ida-ne’e, loron 2 fulan-outubru tinan 2026, tuku 7 kalan, iha RTTL no mídia sosiál sira.
Programa "Página do Governo" hanesan inisiativa ida hosi Gabinete Portavós Governu, ne'ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL no mídia nasionál sira. Programa ne’e nia objetivu atu reforsa transparénsia governamentál no garante sidadaun sira-nia asesu ba atividade no desizaun prinsipál sira Ezekutivu nian. Programa ne'e konta ho Nélia Chaves nu'udar aprezentadora no Ika Moniz nu'udar produtora ezekutiva. Apoiu tékniku fornese hosi ekipa mídia Gabinete Primeiru-Ministru, Prezidénsia Konsellu Ministrus no gabinete hosi membru Governu ne'ebé hetan entrevista.
Portavós Governu, Ministru Agio Pereira, reafirma katak programa "Página do Governo" hanesan instrumentu importante ida hodi promove prestasaun kontas no diálogu entre ezekutivu no sidadaun sira.
