Governu Timor-Leste

Ministru Prezidénsia Konsellu Ministrus, Agio Pereira, iha loron 18 fulan-setembru tinan 2026, iha Dili, hasoru malu ho Embaixadora Austrália ba Asosiasaun Nasoins Sudeste Aziátiku (ASEAN), Tiffany McDonald, Embaixadora Austrália ba Timor-Leste, Caitlin Wilson, no mós reprezentante sira seluk hosi Embaixada no Misaun Austrália nian ba ASEAN, hodi ko’alia kona-ba prioridade komún sira relasiona ho partisipasaun Timor-Leste nian iha ASEAN no kooperasaun entre nasaun rua ne’e iha kontestu ida-ne’e. 

Iha enkontru ne’e ko’alia kona-ba prioridade sira Timor-Leste nian nu’udar Estadu-Membru ASEAN foun, preparasaun ba ezersísiu Prezidénsia organizasaun ne’e nian iha 2029, no posibilidade sira ba kooperasaun bilaterál iha reforsu kapasidade nasionál.

Area sira ne'ebé ko’alia inklui infraestrutura no instalasoins ne'ebé presiza ba realizasaun sorumutu ASEAN nian, rekursus umanus, protokolu, seguransa, jestaun fronteira no seguransa marítima, kapasitasaun iha língua ingleza, komunikasaun, sistema akreditasaun, no mós kooperasaun ne'ebé relasiona ho teknolojia informasaun, inklui siberseguransa.

Ministru Agio Pereira destaka nesesidade ba preparasaun ba tinan 2029 hodi kontribui ba dezenvolvimentu kapasidade nasionál sira ne’ebé sei mantein aleinde ezersísiu Prezidénsia ASEAN nian, no mós apoia Timor-Leste nia partisipasaun iha organizasaun ne’e ba tempu naruk.

Diskute mós esperiénsia sira hosi Prezidénsia sira ASEAN nian uluk nian, no mós dalan sira ne'ebé posivel atu adapta ba sirkunstánsia nasionál, prioridades, no kapasidades Timor-Leste nian. Parte rua ne’e mós diskute kona-ba kontinuasaun koordenasaun hodi identifika área kooperasaun espesífiku sira iha prosesu preparasaun.

Sorumutu ne'e realiza iha ámbitu vizita Embaixadóra Tiffany McDonald nian ba Timor-Leste, ne'ebé hahú iha loron 16 fulan-setembru, iha ne’ebé nia hala’o enkontru ho autoridade nasionál sira kona-ba Timor-Leste nia partisipasaun iha ASEAN no kooperasaun entre nasaun rua ne’e iha kontestu ida-ne’e.