Governu Timor-Leste

Ministru Negósius Estranjeirus no Kooperasaun, Bendito dos Santos Freitas,  iha loron 14 fulan-setembru tinan 2026,  partisipa iha sesaun altu nivel Konferénsia Revizaun Datoluk ba Konvensaun kona-ba Munisaun Fragmentasaun, iha Vientiane, Repúblika Demokrátika Populár Laos, iha ne’ebé nia reafirma kompromisu Timor-Leste nian ba dezarmamentu umanitáriu, protesaun sivíl no direitu umanitáriu internasionál. 

Konferénsia ne'e hala'o iha loron 14 to'o 18 fulan-setembru, ho tema "Aselera Progresu ba Mundu ida ne'ebé Livre hosi Ameasa Munisaun Fragmentasaun", no halibur reprezentantes hosi Estadus Partes, país observadór sira, organizasaun internasionál no entidade sira seluk ne'ebé envolve iha esforsu hodi prevene no hatán ba konsekuénsia umanitária hosi arma sira-ne'e.

Estudu sira ne’e analiza implementasaun hosi Konvensaun no medida sira ne'ebé atu aselera hamoos materiál esplozivu sira, reforsa edukasaun kona-ba riskus, no fó asisténsia ba vítima no komunidade sira ne'ebé afetadu.

Iha ninia intervensaun, Ministru Bendito dos Santos Freitas hato’o Timor-Leste nia solidariedade ba Repúblika Demokrátika Populár Laos no ba komunidade sira ne’ebé afetadu hosi munisaun fragmentasaun no mós materiál esplozivu sira seluk ne’ebé seidauk nakfera.

Ministru mós reafirma Timor-Leste nia determinasaun atu kontribui ba esforsu internasionál hodi promove dame, dignidade umana no protesaun ba jerasaun futuru sira, no mós husu atu hametin kooperasaun rejionál no internasionál iha ámbitu dezarmamentu umanitáriu.

Konferénsia ne'e sei analiza no adopta Planu Asaun Vientiane nian ba tinan 2027–2031, ne'ebé sei orienta implementasaun Konvensaun nian iha tinan lima oinmai, ho medidas iha área sira hamoos no destroi enjeñu, edukasaun kona-ba riskus, asisténsia ba vítima sira, no mós kooperasaun internasionál.

Durante konferénsia ne’e, Bendito dos Santos Freitas mós hasoru malu ho Vise-Ministra Negósius Estranjeirus Vietnam, Nguyen Thi Hoang Van. Parte rua ko’alia kona-ba dezenvolvimentu relasaun bilaterál, hafoin vizita ofisiál Primeiru-Ministru Kay Rala Xanana Gusmão nian ba Vietname iha fulan-juñu tinan ida-ne’e.

Sorumutu ne’e ko’alia kona-ba akompañamentu ba dokumentu haat ne’ebé asina durante vizita ne’e, negosiasaun ba Akordu Promosaun no Protesaun Investimentu, prosesu ne’ebé relasiona ho Akordu Komérsiu Bilaterál no realizasaun reuniaun dahuluk Komisaun Konjunta Vietname-Timor-Leste nian. Parte rua ne'e mós ko'alia kona-ba preparasaun atu komemora aniversáriu estabelesimentu relasoins diplomátikas nian ba da-25, iha tinan 2027.

Durante konferénsia ne’e, Ministru Negósius Estranjeirus no Kooperasaun mós partisipa iha jantár ofisiál ne’ebé oferese hosi Vise-Primeiru-Ministru no Ministru Negósius Estranjeirus Repúblika Demokrátika Populár Laos, Thongsavanh Phomvihane, ba delegasaun partisipante sira.

Konferénsia Revizaun datoluk kontinua iha Vientiane to’o loron 18 fulan-setembru, ho objetivu atu avalia progresus ne’ebé alkansa ona no define prioridade sira ba faze implementasaun Konvensaun tuirmai.