Governu Timor-Leste

Edisaun ba dala 27 hosi programa “Página do Governo” ho partisipasaun hosi Sekretáriu Estadu Florestas, Fernandinho Vieira, sei fó sai iha sesta-feira ida-ne’e,  loron 11 fulan-setembru tinan 2026, tuku 7 kalan, iha Rádiu no Televizaun Timor-Leste (RTTL) no iha mídia sosiál sira.

Iha edisaun ida-ne’e, Sekretáriu Estadu aprezenta vizaun no prioridade sira husi Governu Konstitusionál IX kona-ba jestaun no konservasaun rekursu florestál sira no mós biodiversidade Timor-Leste nian, ho foku ba  reflorestasaun, rekuperasaun área sira ne’ebé degradadu, jestaun komunitária ba rekursus naturais, no kontribuisaun floresta nian ba protesaun ambientál, dezenvolvimentu sustentável no hadi’a kondisaun moris komunidade rurál sira nian.

Durante entrevista ne’e, Fernandinho Vieira ko’alia kona-ba programa produsaun no distribuisaun ai-oan, ne’ebé oras ne’e daudaun liu rihun 200 kada tinan, liuhusi viveiru permanente no komunitáriu sira ne’ebé  iha munisípiu oioin. Nia mós esplika oinsá sistema agroflorestál no envolvimentu husi komunidade sira  bele armoniza  konservasaun rekursus naturais ho  kriasaun oportunidade ekonómika ba família sira.

Programa ne’e mós aprezenta projetu reflorestasaun sira ne’ebé dezenvolve hamutuk ho parseiru internasionál sira, medidas atu hatán ba efeitu sira hosi mudansa klimátika, no mós dezafius ne’ebé relasiona ho protesaun ba área floresta sira. Dada-lia ne’e mós aborda área protejida sira no sira-nia potensiál ba turizmu natureza, no mós perspetiva sira ba valorizasaun ekonómika florestas nian liuhosi mekanizmu sira hanesan kréditus karbonu.

Entre tema sira ne'ebé destakadu iha mós inkluzaun Parke Nasionál Nino Konis Santana iha Rede Mundiál hosi Rezerva Biosfera  UNESCO nian iha fulan-juñu tinan ida-ne'e, ne'ebé Fernandinho Vieira konsidera hanesan "marku istóriku ida ba Timor-Leste". Sekretáriu Estadu esplika durante programa ne’e  importánsia husi rekoñesimentu ida-ne’e ba konservasaun patrimóniu naturál no ba komunidade sira ne’ebé hela iha área parke nian.

Iha Entrevista ne’e mós analiza dezafiu prinsipál sira iha setór ne’e,  liuliu nesesidade atu reforsa protesaun ba ai-laran no área protejida sira. Iha ninia mensajen ba populasaun, Fernandinho Vieira subliña katak "proteje no konserva florestas la'ós de'it responsabilidade Governu nian, maibé hanesan devér koletivu  ida hosi sidadaun hotu-hotu" no, haree ba tempu bailoron, husu atu la bele sunu rai arbiru  no proteje biodiversidade.

 “Rai ne’e ita-nian no ita hotu iha responsabilidade atu tau-matan ba rai ne’e”, dehan Sekretáriu Estadu.

Programa "Página do Governo" hanesan inisiativa ida hosi Gabinete Portavós Governu, ne'ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL no mídia nasionál sira. Programa ne’e nia objetivu  atu reforsa transparénsia governamentál no garante sidadaun sira-nia asesu ba atividade no desizaun prinsipál sira Ezekutivu nian. Programa ne'e konta ho Nélia Chaves nu'udar aprezentadora no Ika Moniz nu'udar produtora ezekutiva. Apoiu tékniku fornese hosi ekipa mídia Gabinete Primeiru-Ministru, Prezidénsia Konsellu Ministrus no gabinete hosi membru Governu ne'ebé hetan entrevista.

Portavós Governu, Ministru Agio Pereira, reafirma katak programa "Página do Governo" hanesan instrumentu importante ida hodi promove prestasaun kontas  no diálogu entre ezekutivu no sidadaun sira.

Governu konvida populasaun tomak atu akompaña programa “Página do Governo” edisaun da-27 nian, sesta-feira  ida-ne’e, loron 11 fulan-setembru tinan 2026, tuku 7 kalan, iha RTTL no mídia sosiál sira.