Ministériu Saúde no Misaun Lepra reforsa kooperasaun iha prevensaun no tratamentu lepra
Durante Sesaun Komité Rejionál OMS ba Sudeste Aziátiku ba da-79, ne'ebé hala'o iha Dili, Ministériu Saúde no Fundasaun Nasionál Misaun Lepra Timor-Leste (ML-TL), iha loron 8 fulan-setembru tinan 2026, asina, Memorandu Entendimentu ida ne'ebé ho objetivu atu reforsa kooperasaun iha prevensaun, detesaun lalais, tratamentu no kontrolu ba lepra iha Timor-Leste. 
Ministra Saúde, Élia A. A. dos Reis Amaral no Ministra Solidariedade no Inkluzaun, Verónica das Dores maka sai sasin iha Asinatura Memorandu ne’e.
Akordu ne’e estabelese enkuadramentu ba realizasaun atividades no programas Misaun Lepra nian iha koordenasaun ho Ministériu Saúde no mós ba ninia integrasaun iha Programa Saúde Integradu, tuir Planu Estratéjiku Nasionál Setór Saúde nian.
Kooperasaun ne’e ho objetivu atu hadi’a asesu servisu saúde ba ema sira ne’ebé hetan moras lepra, liuliu iha komunidade vulneravel sira, no mós reforsa detesaun lalais no tratamentu, hodi nune’e bele prevene komplikasaun no defisiénsia ne’ebé iha relasaun ho moras refere.
Memorandu ne’e prevee mós atividade atu hasa’e konxiénsia komunidade sira nian kona-ba prevensaun lepra no mós kombate estigma no diskriminasaun, nune’e mós apoiu ba reabilitasaun no reintegrasaun sosiál ba ema sira ne’ebé afetada.
Iha ámbitu kooperasaun ida-ne’e, sei hasa’e mós kapasidade profisionál saúde sira nian liuhusi formasaun, orientasaun no fahe esperiénsia, nune’e mós koordenasaun entre Ministériu Saúde, Misaun Lepra no parseiru sira seluk ne’ebé envolve iha implementasaun programa prevensaun no kontrolu ba moras ne’e.
Iha ninia intervensaun, Ministra Saúde destaka nesesidade atu mantein atensaun kona-ba lepra, nu’udar parte hosi kompromisu Governu nian atu garante asesu populasaun ba kuidadus saúde, no mós salienta kontributu husi esperiénsia ekipa Misaun Lepra nian ba identifikasaun kazu ho lalais no definisaun ba tratamentu ne’ebé adekuadu.
Serimónia ne’e marka prezensa mós husi dirijentes Ministériu Saúde, membrus Konsellu Misaun Lepra Timor-Leste nian, xefes departamentu no reprezentante husi entidade sira ne’ebé envolve.
