Vise-Primeiru-Ministru akompaña Prezidente Repúblika iha vizita ba Singapura no partisipa iha Horasis Visionary Circle 2026
Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, akompaña Prezidente Repúblika, José Ramos-Horta, iha vizita ida ba Singapura, husi loron 4 to’o 6 fulan-setembru tinan 2026, iha ne’ebé sira partisipa iha Horasis Visionary Circle 2026 
Sorumutu internasionál ne'ebé hala'o ho tema "Lidera iha Tempu ne’ebé laiha Serteza" (Leading Through Uncertainty) no organiza hosi Vickers Venture Partners, halibur emprezáriu, lider emprezariál no figura internasionál sira seluk hodi diskute kona-ba dezafiu lideransa, responsabilidade, no mós definisaun estratéjias ba tempu naruk iha kontestu ida ne'ebé marka husi mudansa jeopolítika, ekonómika no teknolójika.
Ajenda sorumutu ne’e, ko’alia mós asuntu sira seluk hanesan perspetiva ekonómika globál, papél Singapura iha ekonomia internasionál, relasaun entre rikusoin no responsabilidade, jestaun ba intelijénsia artifisiál, no mós diversifikasaun ekonómika Timor-Leste nian.
Iha loron dahuluk, Prezidente Repúblika partisipa iha konversa espesiál ida ne'ebé modera hosi Barão Woolley de Woodford, membru ida hosi Kámara Lordes Reinu Unidu nian.
Durante ninia partisipasaun iha forum ne’e, Vise-Primeiru-Ministru Francisco Kalbuadi Lay ko’alia kona-ba esperiénsia istórika Timor-Leste, no destaka kona-ba luta rezisténsia Timór nian, ne’ebé lidera hosi Kay Rala Xanana Gusmão, atuál Primeiru-Ministru.
Iha ninia diskursu, Francisco Kalbuadi Lay salienta papél lideransa nian, vizaun estratéjika no kompromisu ba unidade nasionál iha reorganizasaun rezisténsia no mobilizasaun populasaun hodi hetan independénsia. Nia mós fó hanoin fali kona-ba kolaborasaun entre Frente Armada, Frente Klandestina no Frente Diplomátika, no mós kontribuisaun hosi frente tolu ba luta libertasaun nasionál.
Durante sorumutu ne’e, Prezidente José Ramos-Horta aprezenta mós Timor-Leste nia perspetiva nu’udar ponte entre Sudeste Aziátiku no Pasífiku no mós ko’alia kona-ba oportunidade investimentu iha país ne’e, liuliu iha setór enerjia, turizmu no dezenvolvimentu sustentável.
Xefe Estadu afirma katak "Timor-Leste iha kruzamentu úniku ida, la'ós de'it nu'udar nasaun joven ida ne'ebé konsolida hela ninia demokrasia, maibé mós nu'udar ponte potensiál ida entre dinamizmu Sudeste Aziátiku, no poténsia boot Pasífiku nian".
Partisipasaun iha Horasis Visionary Circle 2026 ne’e, permite atu aprezenta Timor-Leste nia esperiénsia no perspetiva nasionál kona-ba dezenvolvimentu ekonómiku, diversifikasaun no kooperasaun rejionál ba lider emprezariál no partisipante internasionál sira seluk.
