Governu no RTTL asina akordu
Governu Konstituisonál IV, liu husi Sekretaria Estadu Konsellu Ministru (SEKM) iha Sesta ne’e loron 27 fulan Maiu nian, asina Memorandu Entendimentu rua ho Rádiu Televizaun Timor-Leste (RTTL, E.P).
Dokumentu ida husi dokumentu rua ne’e garante kontinuidade emisora nasionál Timor-Leste nian, kona-ba tranzmisaun Programa sira Rádiu Governu nian iha lian Portugés no Tetun iha Rádiu Timor-Leste (RTL).
Programa hirak ne’e sai hanesan responsabilidade SEKM nian no tuir Memorandu Entendimentu Programa Rádiu “Adeus Konflitu Bem-vindu Dezenvolvimentu” sei kontinua nafatin ba tinan rua tuituir malu, nu’udar rezultadu husi servisu hamutuk ho RTTL. Fó sai programa ne’e iha AM/FM, via satelite, no liu husi espasu on-line Governu nian ida, ne’ebé iha hela dezenvolvimentu nia laran.
Diretór-Jerál Sekretaria Estadu Konsellu Ministru nian, Victor Maia, hafoin asina dokumentu sira ne’e, esplika katak “objetivu hosi asina nota entendimentu rua ne’e, primeiru mak atu garante kontinuasaun ba transmisaun programa Rádiu Governu nian, Adeus Konflitu Benvindu Dezenvolvimentu iha lian portugés no Tetun, liu-liu kona-bá divulgasaun atividade no programa sira Governu nian no sorumutu iha plenária Parlamentu nasionál nian. Nota entendimentu ne’e mós ko’alia kona-ba SECM ho Rádiu Timor-Leste oferese espasu foun ida ba emisaun rádiu nian liu hosi sistema online ka liu hosi internet”.
Memorandu entendimentu ida tuir fali reforsa kontinuidade produsaun programa Televizaun ho karater institusionál . “Pájina Governu nian” iha lian tetun, mak programa semanál ida ne’ebé ho nia objetivu mak habelar atividade sira Governu nian, liuliu knaar hirak ne’ebé la’o hela iha nivel distritu sira. Liu husi dalan entrevista ho populasaun, funsionáriu públiku no membru Governu nian sira, hakarak fó informasaun ba populasaun sira kona projetu no atividade oioin ne’ebé la’o hela iha rai laran. Programa ne’e dura minutu 45 nia laran no sai hanesan responsabilidade SEKM nian, liu husi Diresaun Nasionál Diseminasaun Informasaun, Departamentu Komunikasaun Sosiál, liu husi servisu hamutuk ho Televizaun Timor-Leste (TVTL) no fó sai iha semana nian rohan. Iha dokumentu ne’e mós prevee kona-ba posibilidade atu prodús program (pájina Governu nian) iha lian Portugés, ne’ebé sei hahú iha Tinan 2011.
Membru Konsellu Administrasaun RTTL, EP., nian, Abel Lare Sina Ximenes, haktuir “liu hosi asina akordu ida ohin estabelese ona parseria ida entre Governu ho RTTL, E.P. atu disemina informasaun kona-ba atividade no programa governu nian liu hosi programa Televizaun no Rádiu. Emisaun rádiu liu hosi sistema online ne’e, foin mak atu hahú iha Timor-Leste, liuliu iha Rádiu Timor-Leste. Sekretaria Estadu Konsellu Ministrus nia prezensa iha RTTL, EP, nu’udar avansa boot ida mai instituisaun ne’e, tanba bele fasilita ema iha mundu tomak atu hatene programa no atividade governu Timor-Leste nian liu hosi internet”.
