Governu Timor-Leste

Ministru Prezidénsia Konsellu Ministrus no Interlokutór iha diskusaun sira kona-ba Greater Sunrise, Agio Pereira, hasoru malu iha loron 27 fulan-agostu tinan 2026, iha Palásiu Governu Dili, ho Paul Sullivan, Vise-Prezidente Seniór hosi Woodside Energy ba dezenvolvimentu kampu Greater Sunrise, akompaña hosi Diretór Nasionál Woodside nian iha Timor-Leste, António dos Santos, atu analiza progresus iha diskusaun sira no pasu sira tuirmai ba dezenvolvimentu projetu ne’e. 

Durante enkontru, analiza progresu ne'ebé hetan iha diskusaun sira foin lalais ne'e entre partes no serbisu sira ne'ebé la'o hela kona-ba enkuadramentu legál, fiskál, tékniku no komersiál ne'ebé nesesáriu ba dezenvolvimentu Greater Sunrise nian.

Parte sira aborda mós estudu sira ne'ebé relasiona ho dezenvolvimentu LNG (TLNG) Timor-Leste nian, konseitu produsaun gás naturál likefeitu iha Timor-Leste hosi rekursus Greater Sunrise nian, nune'e mós artikulasaun entre komponente oioin hosi projetu ne’e.

Ministru Agio Pereira ho reprezentante sira hosi Woodside reafirma importánsia hodi mantén diálogu no kontinua serbisu entre parte sira, ho hanoin atu avansa diskusaun sira no estudus ne'ebé nesesáriu ba dezenvolvimentu Greater Sunrise nian.

Woodside, empreza enerjétika ida Austrália nian no operadór hosi Sunrise Joint Venture, ho partisipasaun 33,44% iha konsórsiu dezenvolvimentu kampu Greater Sunrise nian, hamutuk ho TIMOR GAP ne'ebé kaer 56,6%, no Osaka Gas Australia ho partisipasaun maizumenus 10%.